गुरुवार, 29 ऑक्टोबर 2026
वसई । रवींद्र माने : पुण्याप्रमाणेच विरारमध्येही गर्दुल्यांची कोयता गॅंग सक्रीय झाली असून, एका नागरिकावर भर रस्त्यात जीवघेणा हल्ला करण्यात आल्यामुळे येथील नागरिक दहशतीखाली वावरत आहेत.
विरारच्या बरफपाड्यात मोठ्या प्रमाणात परप्रांतियांची वसाहत उभी राहीली आहे. या बकाल वस्तीत काही गर्दुले आपली दहशत माजवण्यासाठी कंबरेला कोयता लटकवून फिरत असल्याचे येथील रहिवाशांचे म्हणणे आहे. शुक्रवारी सायंकाळी येथील रहिवाशी प्रवीण ठाकूर घराबाहेर पडले असता, त्यांच्यावर तीन जणांनी हल्ला केला. त्यापैकी एकाने आपल्या जवळील कोयत्याने त्यांच्यावर वार केले. हे वार चुकवण्यासाठी ठाकूर यांनी हात पुढे केल्यामुळे त्यांच्या दोन्ही हाताला गंभीर दुखापत झाली आहे. तसेच त्यांच्या छातीलाही मुकामार बसला आहे. या हल्ल्यातून सुटका करुन ठाकूर यांनी पोलीस ठाणे गाठल्यावर फिर्याद न घेता त्यांना अगोदर हातावर उपचार करुन येण्यास पोलीसांनी सांगितले.
[read_also content=”शेतकऱ्यांच्या जागेवर बिल्डरची घुसखोरी, शेतकऱ्यांचा आक्रमक आंदोलनाचा इशारा https://www.navarashtra.com/maharashtra/kalyan-builders-intrusion-on-farmers-land-warning-of-aggressive-agitation-by-farmers-539065.html”]
त्यामुळे ठाकूर यांनी वसईतील काही हॉस्पिटल पालथी घातल्यानंतर मुबंईतील नायर रुग्णालय गाठले. तिथे उपचार करुन परतल्यावर पोलीस ठाण्यात त्यांनी तक्रारीसाठी धाव घेतली. तिथेही त्यांना सकाळी 11 ते सायंकाळी 8 वाजेपर्यंत बसवून ठेवण्यात आले. लक्ष्मण जाधव, आशिष जाधव आणि दीपक जाधव या तिघांनी हा हल्ला केल्याची तक्रार ठाकूर यांनी केली असून, त्यानुसार अखेर 324, 504, 506, 34 कलमान्वये गुन्हा दाखल करण्यात आला आहे. हल्लेखोरांना मात्र अटक करण्यात आली नसल्याचे ठाकूर यांनी सांगितले.
या हल्ल्यामुळे बरफपाड्यात गर्दुल्यांची दहशत पसरली असून, कोयता घेऊन फिरणाऱ्यांपासून आपल्या मुलींचे, मुलांचे संरक्षण करण्यासाठी त्यांना घरी सुखरुप आणण्यासाठी पालक रात्री-बेरात्री नाक्यावर जाऊन उभे रहात आहेत. आता तरी पोलीसांनी दखल घेऊन या दहशतीतून आमची सुटका करावी अशी मागणी येथील महिलांनी केली आहे.
