नर्तकीवर पैसे उधळण्यासाठी ‘तो’ झाला चोर; फुरसुंगी पोलिसांनी आरोपीला ठोकल्या बेड्या

नर्तकीवर पैसे उधळण्यासाठी शेजाऱ्याचे घर फोडून सोन्याचा ऐवज चोरी करणाऱ्या एका चोरट्याला फुरसूंगी पोलिसांनी बेड्या ठोकल्या आहेत.

• नर्तकीवर पैसे उधळण्यासाठी झाला चोर
• फुरसुंगी पोलिसांनी आरोपीला ठोकल्या बेड्या
• शेजाऱ्याचेच घर फोडल्याने चर्चा रंगली

पुणे : नर्तकीवर पैसे उधळण्यासाठी शेजाऱ्याचे घर फोडून सोन्याचा ऐवज चोरी करणाऱ्या एका चोरट्याला फुरसूंगी पोलिसांनी बेड्या ठोकल्या आहेत. दरम्यान, शेजाऱ्याचेच घर फोडल्याने तसेच नर्तकीसाठी चोर झाल्याने परिसरात चांगलीच चर्चा रंगली आहे. राहुल उत्तम पठारे (वय ३९, रा. होळकरवाडी) असे चोरट्याचे नाव आहे. त्याच्याकडून चोरी केलेले ६ लाख १४ हजार रुपये किंमतीचे सोन्याचे पाच तोळ्याचे दागिणे जप्त करण्यात आले होते. त्याने हे दागिणे एका सोनाराकडे विक्री केले होते.

ही कारवाई वरिष्ठ निरीक्षक अमोल मोरे, गुन्हे निरीक्षक राजेश खांडे यांच्या मार्गदर्शनाखाली उपनिरीक्षक विष्णू देशमुख व त्यांच्या पथकाने केली आहे. होळकरवाडी येथील राहणारे अभिजित पठारे यांच्या घरात चोरी झाली होती. विवाहाच्या निमित्ताने बाहेरगावी गेल्यानंतर चोरट्याने त्यांच्या घरातून सोन्याचा ऐवज चोरी केला होता. दरम्यान, याप्रकरणी, अभिजित यांनी दिलेल्या तक्रारीनुसार फुरसूंगी पोलिसांनी अज्ञात चोरट्याविरुद्ध घरफोडीचा गुन्हा दाखल केला होता. या गुन्ह्याच्या अनुषंगाने पोलिस तपास करत होते.

पोलिस कर्मचारी सागर वणवे व अभिजित टिळेकर यांना त्यांच्या बातमीदारामार्फत माहिती मिळाली, की ही चोरी राहुल पठारे याने केली असून, काही सोने महंमदवाडी येथील एका सराफी पेढीत विक्री केले आहे. त्यानुसार पोलिसांनी राहुलला ताब्यात घेतले. चौकशीत राहुलने सांगितले की, त्याला नर्तकीसोबतच्या बैठकीचा आणि नाचगाण्याचा छंद आहे. त्यासाठी त्याला पैसे हवे होते. अधिक तपासात त्याने गुन्ह्याची कबूली दिली. अधिक तपास पोलिस करत आहेत.

घरफोडीचा झाला उलगडा

अभिजित आणि आरोपी राहुल हे एकाच परिसरात राहतात. राहुलचे अभिजित यांच्या घरी येणे- जाणे असते. त्यातूनच त्याने संधी मिळताच अभिजित यांच्या घरातून सोन्याचा ऐवज चोरी केली. सुरूवातीला राहुल बाबात कोणी काही बोलायला तयार नव्हते. परंतू पोलिसांनी तांत्रिक विश्लेषन आणि गोपनिय बातमीदरामार्फत तपास करून राहुलला असलेल्या नर्तकीच्या छंदाची माहिती गोळा केली. त्यातून पुढे या घरफोडीचा उलगडा झाला. चोरीच्या ऐवजाबाबत राहुल याला विचारले असता त्याने सांगितले, चोरीतील काही सोने महंमदवाडी येथील एका सराफ पेढीत विक्री केली आहे. त्यातून आलेले ३० हजार रुपये स्वतःवर खर्ची केले होते.