नालासोपारा एमडी ड्रग्ज प्रकरणाचे तेलंगणापर्यंत धागेदोरे, अवैध कारखाना उद्ध्वस्त; २५ आरोपींना अटक
नालासोपारा पूर्व येथील प्रगतीनगर परिसरात दोन तरुणांकडून ११२ ग्रॅम मेफेड्रोन (एमडी) हा अंमली पदार्थ जप्त केल्यानंतर या प्रकरणाचा तपास सुरू झाला होता. अविनाश ऊर्फ सोन लोकनाथ अय्यर (वय २२) आणि रविकांत ओमप्रकाश राम (वय २३) यांच्याकडून जप्त करण्यात आलेल्या एमडी ड्रग्जची किंमत अंदाजे ३ लाख ३६ हजार रुपये होती. याप्रकरणी तुळिंज पोलीस ठाण्यात गुन्हा दाखल करण्यात आला होता. गुन्ह्याचे गांभीर्य लक्षात घेऊन पुढील तपास गुन्हे प्रकटीकरण शाखा कक्ष-४ कडे सोपवण्यात आला. तपासादरम्यान पोलिसांनी गुजरातमधील कच्छ जिल्ह्यात आणि उत्तर प्रदेशातील प्रयागराज जिल्ह्यात एमडी ड्रग्ज तयार करण्यासाठी सुरू असलेले दोन अवैध कारखाने उघड करून उद्ध्वस्त केले. या कारवाईत आतापर्यंत ६९ किलो ८७१ ग्रॅम एमडी ड्रग्ज, रोख रक्कम, सुमारे २६० लिटर केमिकल आणि प्रयोगशाळेतील साहित्य जप्त करण्यात आले आहे.
तपासाची व्याप्ती वाढवत पोलिसांनी या प्रकरणातील आणखी पाच आरोपींना अटक केली. त्यानंतर एमडी ड्रग्ज निर्मितीसाठी वापरल्या जाणाऱ्या 2-Bromo-4-Methylpropiophenone या रासायनिक पावडरचा पुरवठा तेलंगणातून होत असल्याची माहिती समोर आली. रमेश बाबू साके हा आरोपी पाशमैलाराम, पटनचेरू येथील औद्योगिक परिसरात ही रासायनिक पावडर तयार करून पुरवत असल्याचे तपासात निष्पन्न झाले. त्यानुसार गुन्हे प्रकटीकरण शाखा कक्ष-४ च्या पथकाने २१ ऑक्टोबर २०२६ रोजी तेलंगणात छापा टाकून रमेश बाबू साके याला ताब्यात घेतले. त्याचबरोबर संबंधित कारखाना उद्ध्वस्त करून अंदाजे २७ लाख ६ हजार ७०० रुपये किमतीची ४४ किलो ६९९ ग्रॅम रासायनिक पावडर, इतर केमिकल आणि प्रयोगशाळेतील साहित्य जप्त केले. या कारवाईत सायबराबाद पोलीस आयुक्तालयातील पटनचेरू पोलिसांनी सहकार्य केले.
या प्रकरणात एमडी ड्रग्ज तयार करणारे, त्यासाठी लागणारी रसायने व प्रयोगशाळेतील साहित्य पुरवणारे, अंमली पदार्थांची तस्करी करणारे, विक्री करणारे आणि आर्थिक व्यवहार सांभाळणारे अशा विविध स्तरांवरील एकूण २५ आरोपींना नालासोपारा, मुंबई, कल्याण, नेरळ, जळगाव तसेच गुजरात, उत्तर प्रदेश आणि तेलंगणा येथून अटक करण्यात आली आहे.
ही कारवाई पोलीस आयुक्त निकेत कौशिक, अपर पोलीस आयुक्त संजय शिंत्रे, पोलीस उपायुक्त (गुन्हे) संदीप डोईफोडे आणि वरिष्ठ पोलीस निरीक्षक नितीन पाटील यांच्या मार्गदर्शनाखाली गुन्हे प्रकटीकरण शाखा कक्ष-४ च्या पथकाने केली. या कारवाईमुळे एमडी ड्रग्ज निर्मितीसाठी लागणाऱ्या रासायनिक पदार्थांचा पुरवठा करणाऱ्या साखळीवर मोठा आघात झाल्याचे मानले जात आहे.
Ans: मिरा-भाईंदर, वसई-विरार पोलिसांच्या गुन्हे प्रकटीकरण शाखा कक्ष-४ ने तेलंगणातील पाशमैलाराम, पटनचेरू परिसरात एमडी ड्रग्ज निर्मितीसाठी लागणारी रासायनिक पावडर तयार करणारा अवैध कारखाना उद्ध्वस्त केला.
Ans: पोलिसांनी ४४ किलो ६९९ ग्रॅम रासायनिक पावडर, इतर केमिकल आणि प्रयोगशाळेतील साहित्य जप्त केले. या रासायनिक पावडरची किंमत अंदाजे २७ लाख ६ हजार ७०० रुपये आहे.
Ans: या प्रकरणात आतापर्यंत एकूण २५ आरोपींना अटक करण्यात आली आहे. नालासोपारा येथून सुरू झालेल्या तपासात गुजरात, उत्तर प्रदेश आणि तेलंगणा येथील अवैध कारखाने उघडकीस आले.
.png "Videos"){kind=small}
