धक्कादायक ! चोर म्हटल्याने नातवाने आजीची केली हत्या; आजीला रक्ताच्या थारोळ्यात सोडलं अन् नंतर…

इंदू या धम्म उपासिका होत्या. नेहमी पांढऱ्या साडीत वावरत असत. त्यांना मुलगा आणि दोन मुली असून, सर्वजण विवाहित आहेत. मुलगा अभियंता तर सून शासकीय नोकरीला आहे.

नागपूर : गेल्या काही दिवसांपासून गुन्हेगारीच्या घटनांमध्ये वाढ होताना दिसत आहे. किरकोळ कारणावरून खून, खुनाचा प्रयत्न यांसारख्या घटना घडत आहेत. त्यातच नागपुरातही असाच प्रकार घडला. नकळत बँकेतून २० हजार रुपये काढल्यामुळे आजीने नातवाला फटकारले. चोर म्हणून सतत टोमणे देऊ लागली. याचा राग मनात धरून नातवाने धारदार शस्त्राने आजीच्या गळा, छाती आणि पोटावर सपासप वार करून हत्या केली.

इंदू किशोर चव्हाण (वय ६८, रा. लष्करीबाग) असे मृत महिलेचे नाव आहे. पोलिसांनी आरोपी राज बागडे (वय २४) याला अटक केली आहे. बँकेतून २० हजार रुपये काढल्यामुळे आजीने नातवाला फटकारले. चोर म्हणून सतत टोमणे देऊ लागली. याचा राग मनात धरून नातवाने धारदार शस्त्राने आजीच्या गळा, छाती आणि पोटावर सपासप वार करून हत्या केली. यानंतर मृतदेह घरातच कोंडून पसार झाला. ही घटना पाचपावली पोलिस ठाण्याच्या हद्दीतील लष्करीबाग परिसरात घडली.

मिळालेल्या माहितीनुसार, इंदू या धम्म उपासिका होत्या. नेहमी पांढऱ्या साडीत वावरत असत. त्यांना मुलगा आणि दोन मुली असून, सर्वजण विवाहित आहेत. मुलगा अभियंता तर सून शासकीय नोकरीला आहे. दोघेही कुटुंबासह बाहेरगावी राहतात. इंदू या शिलाई मशीनचे काम करायच्या. त्यामुळे वरच्या मजल्यावरच राहायच्या. पती किशोर हे खाली राहायचे. शेजारीच राहणारा राज हा त्यांचा चुलत नातू आहे. त्याचे नेहमीच घरी ये-जा होते. आधी तो दुकानात काम करायचा. सध्या रिकामाच होता.

आजीच्या खात्यातून परस्पर काढले 20 हजार

काही दिवसांपूर्वी राजने आजीला फसवून बँक खात्यातील २० हजार रुपये काढले. यामुळे आजी संतापली होती. यावरून तिने नातवाला फटकारले. तिने त्याला ‘चोर’ म्हटले होते. आजीचे शब्द त्याच्या जिव्हारी लागले. सततच्या टोपण्यामुळे तो संतापला होता.

ऑनलाईन चाकू मागवून रचला कट

आजीचा काटा काढण्याचा निर्णय घेत आरोपीने ऑनलाईन चाकू मागवला. गुरुवारी मध्यरात्री तो आजीच्या खोलीत शिरला. त्यावेळी इंदू कपडे शिवत होत्या. आजी काही समजण्याच्या आतच गळ्यावर वार केला. त्यानंतर छाती आणि पोटावर वार केले. यात इंदू रक्ताच्या थारोळ्यात कोसळल्या. आजीचा मृत्यू झाल्याची खात्री झाल्यानंतर आरोपी काही वेळ विचार करत थांबला. त्यानंतर त्याने मृतदेह ओढत बाथरूमच्या दिशेने नेला. घराला कुलूप लावले आणि घटनास्थळावरून फरार झाला.

सकाळी उघडकीस आली घटना

शुक्रवारी सकाळ झाली तरी इंदू यांच्या खोलीचे दार बंद होते. पतीने वर जाऊन कुलूप उघडले. समोरचे दृश्य पाहताच त्यांच्या पायाखालची जमीन सरकली. सकाळी सुमारे १० वाजता ही बातमी परिसरात वाऱ्यासारखी पसरली आणि घटनास्थळी नागरिकांची मोठी गर्दी जमली. माहिती मिळताच पाचपावली पोलिसांनी घटनास्थळी धाव घेत पंचनामा केला आणि मृतदेह शवविच्छेदनासाठी रुग्णालयात पाठवला. पुढील तपास सुरू आहे.

Rajapur Crime : चोरी करुन पळालेल्या ‘त्या’ आरोपींची गाडी पोलिसांना सापडली; आयफोनसह सात माेबाईलही हस्तगत