Crime News: आईला फोन करून म्हणाली, ‘माझ्यासोबत मारहाण झाली’; काही वेळातच होमस्टेमध्ये विद्यार्थिनीला पाहताच...
गुवाहाटी: आईला फोन करून आपल्यासोबत मारहाण झाल्याचे सांगितल्यानंतर काही वेळातच मोबाइल बंद झालेल्या २१ वर्षीय विद्यार्थिनीचा होमस्टेमध्ये मृतदेह आढळल्याने खळबळ उडाली आहे. गुवाहाटी विद्यापीठात शिक्षण घेणाऱ्या निमिषा ठाकूरिया हिच्या मृत्यूप्रकरणी पोलिसांनी तिच्यासोबत असलेल्या आसिफ अली याला अटक केली आहे. आसिफने निमिषाने आत्महत्या केल्याचा दावा केला असला तरी पोलिसांनी हा दावा अद्याप मान्य केलेला नाही. मृत्यूच्या परिस्थितीचा सर्व बाजूंनी तपास सुरू आहे.
निमिषा ठाकूरिया ही धारापूर येथील रहिवासी असून गुवाहाटी विद्यापीठात पाच वर्षांच्या इंटिग्रेटेड अभ्यासक्रमात शिक्षण घेत होती. शुक्रवारी रात्री ती एका मित्रासोबत घराबाहेर पडली होती. त्यानंतर तिने आईला फोन करून आपल्यासोबत मारहाण झाल्याचे कथितरीत्या सांगितले. हा फोन झाल्यानंतर काही वेळातच तिचा मोबाइल बंद झाला. मुलीशी संपर्क होत नसल्याने कुटुंबीय चिंतेत पडले. त्यांनी आजरा पोलिसांना याबाबत माहिती दिली. त्यानंतर पोलिसांनी निमिषाचा शोध सुरू केला.
शोध घेत असताना गराल परिसरातील ‘Rudreas Kitchen’ या होमस्टेमध्ये निमिषाचा मृतदेह आढळून आला. घटनेची माहिती मिळताच पोलिसांनी घटनास्थळी जाऊन तपास सुरू केला. तिच्यासोबत होमस्टेमध्ये असलेल्या आसिफ अली याला पोलिसांनी ताब्यात घेतले.
पोलिसांच्या चौकशीत आसिफ अलीने निमिषाने छताच्या पंख्याला गळफास घेऊन आत्महत्या केल्याचा दावा केल्याचे सांगण्यात आले. मात्र, पोलिस या दाव्याची पडताळणी करत आहेत. निमिषाच्या शरीरावर जखमेच्या खुणा आढळल्याचे पोलिसांच्या प्राथमिक माहितीतून समोर आले आहे. त्यामुळे मृत्यू नेमका कोणत्या परिस्थितीत झाला, याचा तपास अधिक गांभीर्याने केला जात आहे. घटनास्थळी मिळालेले पुरावे, होमस्टेमधील परिस्थिती, निमिषाचा मोबाइल आणि तिच्यासोबत असलेल्या व्यक्तीची माहिती या सर्व बाबी तपासल्या जात आहेत. आईला केलेला शेवटचा फोन आणि त्यानंतर मोबाइल बंद होण्याची बाबही तपासाचा महत्त्वाचा भाग आहे.
निमिषाचा मृतदेह पोस्टमॉर्टमसाठी गुवाहाटी मेडिकल कॉलेज अँड हॉस्पिटलमध्ये पाठविण्यात आला आहे. पोस्टमॉर्टम अहवालातून मृत्यूचे नेमके कारण आणि शरीरावरील जखमांचे स्वरूप स्पष्ट होण्याची शक्यता आहे. त्यानंतर पोलिसांच्या तपासाला अधिक दिशा मिळू शकते. दरम्यान, या घटनेनंतर धारापूर परिसरात स्थानिक नागरिक आणि विद्यार्थ्यांनी आंदोलन केले. काही संघटनांनी या घटनेला ‘लव्ह जिहाद’शी जोडणारे आरोप केले आहेत. मात्र, पोलिसांनी या दाव्याची पुष्टी केलेली नाही. त्यामुळे सध्या निमिषाच्या मृत्यूचे नेमके कारण स्पष्ट झालेले नसून, पोलिसांकडून उपलब्ध पुरावे आणि पोस्टमॉर्टम अहवालाच्या आधारे पुढील तपास सुरू आहे.
.png "Videos"){kind=small}
