रविवार, 27 सप्टेंबर 2026
सौजन्य फोटो - सोशल मिडीया AI Gemini
धाराशिव: चित्रपटात काम मिळवून देण्याचे तसेच बॉलिवूडमध्ये करिअर घडवून देण्याचे आमिष दाखवत २० वर्षीय तरुणीला जाळ्यात ओढून तिच्यावर अत्याचार केल्याचा आरोप समोर आला आहे. इन्स्टाग्रामवरून ओळख झालेल्या व्यक्तीने आपण चित्रपटसृष्टीतील गायक असल्याचे सांगत अभिनयाची संधी मिळवून देण्याचे आश्वासन दिल्याचे तक्रारीत नमूद आहे. ऑडिशनच्या नावाखाली खासगी छायाचित्रे घेऊन त्याचा गैरवापर करण्याची धमकी दिल्याचा आरोपही करण्यात आला आहे. या प्रकरणी नायगाव पोलिसांनी चौघांविरुद्ध गुन्हा दाखल केला असून, पुढील तपासासाठी प्रकरण धाराशिवमधील आनंदनगर पोलिस ठाण्याकडे वर्ग करण्यात आले आहे.
तक्रारीनुसार, धाराशिव येथील तरुणीची ऑगस्ट महिन्यात कांदिवली येथील जतीन दोशी याच्याशी इन्स्टाग्रामवरून ओळख झाली. दोशीने आपण चित्रपटसृष्टीतील गायक असल्याचे सांगत तिला चित्रपटात काम मिळवून देण्याचे आश्वासन दिल्याचा आरोप आहे. अभिनय क्षेत्रात काम करण्याची इच्छा असल्याने तरुणीने त्याच्यावर विश्वास ठेवला. यानंतर दोशीने व्हिडिओ कॉलद्वारे तिचे ऑडिशन घेतले. चित्रपटातील भूमिकेसाठी विशिष्ट प्रकारचा लूक आवश्यक असल्याचे सांगत त्याने तिला खासगी छायाचित्रे पाठविण्यास सांगितल्याचे तिने पोलिसांना सांगितले. या छायाचित्रांचा पुढे गैरवापर करण्यात आल्याचा आरोप तक्रारीत आहे.
१६ सप्टेंबर रोजी दोशीने तरुणीला बोरिवली येथे बोलावले. त्यानंतर तिच्या आधारकार्डमधील तपशीलात बदल करून तिला नायगाव पोलिस ठाण्याच्या हद्दीतील एका हॉटेलमध्ये नेल्याचा आरोप आहे. तेथे आधी घेतलेल्या छायाचित्रांचा प्रसार करण्याची धमकी देऊन तिच्यावर अत्याचार केल्याचे तरुणीने तक्रारीत म्हटले आहे. या घटनेनंतर तिला आणखी तीन पुरुषांना भेटण्यास सांगितल्याचेही तक्रारीत नमूद आहे. मात्र, तरुणीने त्यास नकार दिला आणि ती धाराशिवला परतली. त्यानंतर या प्रकरणातील काही व्यक्तींकडून तिला धमक्या मिळाल्याचा आरोप करण्यात आला.
जतीन दोशी आणि आनंद मुदलियार यांच्याकडून धमक्या मिळाल्याचे सांगत तरुणीने नायगाव पोलिसांशी संपर्क साधला. तिच्या तक्रारीनंतर पोलिसांनी संपूर्ण घटनाक्रमाची नोंद घेत तपास सुरू केला. सोशल मीडिया संपर्क, फोनवरील संभाषण, ऑडिशनच्या नावाखाली झालेला संपर्क आणि संबंधित ठिकाणांबाबत माहिती गोळा केली जात आहे.
या प्रकरणी पोलिसांनी जतीन दोशी, मिनाज रहमान, आनंद मुदलियार आणि ऋषभ दोशी यांच्याविरुद्ध बलात्कार तसेच माहिती तंत्रज्ञान कायद्याच्या संबंधित कलमांनुसार गुन्हा दाखल केला आहे. प्रकरण पुढील तपासासाठी धाराशिव येथील आनंदनगर पोलिस ठाण्याकडे वर्ग करण्यात आले आहे. तक्रारीतील आरोपांची पडताळणी करण्यासह संबंधित व्यक्तींची भूमिका, डिजिटल पुरावे आणि इतर उपलब्ध माहितीच्या आधारे तपास सुरू आहे. पोलिस तपासातून या प्रकरणातील नेमका घटनाक्रम आणि प्रत्येक आरोपीची भूमिका स्पष्ट होणार आहे. दरम्यान, पीडित तरुणीची ओळख उघड होऊ नये याची काळजी घेण्यात आली आहे.
