Pune Crime: लॉजच्या खोलीत नेमकं काय घडलं? काही वेळाने खोली उघडली अन् समोर आले धक्कादायक वास्तव

हडपसरमधील लॉजमध्ये दोघांमध्ये वाद झाला आणि तरुण काही वेळातच निघून गेला. त्यानंतर तरुणीचा मृत्यू उघडकीस आला; कुटुंबीयांच्या तक्रारीवरून तरुणाला अटक करण्यात आली.

• लॉजमध्ये वादानंतर तरुण निघून गेला
• काही वेळाने तरुणीचा मृत्यू उघड
• तरुणावर आत्महत्येस प्रवृत्त केल्याचा आरोप

पुणे: हडपसर परिसरातील एका लॉजमध्ये २२ वर्षीय तरुणीचा मृत्यू झाल्याची घटना गुरुवारी (२४ सप्टेंबर) सकाळी घडली. तरुणीसोबत लॉजमध्ये आलेल्या तरुणाशी वाद झाल्यानंतर तो तेथून निघून गेला. काही वेळाने तरुणी खोलीत असल्याचे लक्षात आल्यानंतर दरवाजा उघडण्यात आला. त्यावेळी ती मृतावस्थेत आढळली. याप्रकरणी हडपसर पोलिसांनी संबंधित तरुणाला अटक केली आहे. साक्षी संतोष गायकवाड (वय २२, रा. हिवरे, ता. पुरंदर) असे मृत तरुणीचे नाव आहे. विश्वास वामनराव जगताप (देशमुख) (वय २३, रा. सासवड, ता. पुरंदर) असे अटक केलेल्या तरुणाचे नाव आहे. साक्षी आणि विश्वास यांची पूर्वीपासून ओळख होती. गुरुवारी सकाळी दोघे हडपसरमधील एका लॉजमध्ये आले होते.

हेही वाचा:Beed: चोरीनंतर तलावाकाठी केली दागिन्यांची वाटणी; पुरावे पाण्यात, मात्र पोलिसांच्या हाती लागला डीव्हीआर

वादानंतर तरुण निघून गेला

सकाळी साडेनऊच्या सुमारास दोघांमध्ये काही कारणावरून वाद झाल्याचे प्राथमिक तपासात समोर आले आहे. वादानंतर विश्वास हा लॉजमधून निघून गेला. त्यानंतर साक्षी खोलीतच राहिली. काही वेळाने ती बाहेर न आल्याने लॉजमधील कर्मचाऱ्यांनी खोलीची पाहणी केली असता ती मृतावस्थेत आढळली. घटनेची माहिती मिळताच हडपसर पोलिसांनी घटनास्थळी धाव घेतली. पंचनामा करून मृतदेह शवविच्छेदनासाठी पाठवण्यात आला. दरम्यान, साक्षीच्या मृत्यूची माहिती कुटुंबीयांना मिळताच त्यांनी हडपसर पोलिस ठाण्यात धाव घेतली.

हेही वाचा: रिल्समधून दागिन्यांची माहिती देणे पडले महागात; सोशल मीडिया इन्फ्लुएन्सरच्या घरातून ११८ तोळे सोने लंपास

कुटुंबीयांच्या तक्रारीवरून कारवाई

साक्षीच्या वडिलांनी दिलेल्या तक्रारीवरून पोलिसांनी विश्वास जगताप याच्याविरुद्ध आत्महत्येस प्रवृत्त केल्याच्या आरोपाखाली गुन्हा दाखल करून त्याला अटक केली आहे. मात्र, तरुणीच्या मृत्यूमागील नेमकी परिस्थिती आणि वादाचे कारण अद्याप स्पष्ट झालेले नाही. या प्रकरणाचा तपास पोलिस उपनिरीक्षक रत्नदीप बिराजदार करीत आहेत. लॉजमधील सीसीटीव्ही फुटेज, दोघांमधील फोन कॉल्स आणि इतर उपलब्ध पुरावे तपासले जात आहेत. तपासातून घटनेपूर्वी दोघांमध्ये नेमके काय घडले आणि त्याचा मृत्यूशी काय संबंध होता, हे स्पष्ट होण्याची शक्यता आहे.