साताऱ्यात स्कीमच्या नावाखाली अनेकांची फसवणूक; तब्बल लाखो रुपयांना घातला गंडा

आमच्याकडे स्कीममध्ये पैसे गुंतवल्यास रकमेच्या दुप्पट पैसे अथवा दुप्पट रकमेचे सोेने मिळेल, असे आमिष दाखवून ९ लाखांची फसवणूक केल्याचा प्रकार उघडकीस आला आहे. याप्रकरणी तिघांविरोधात गुन्हा दाखल झाला आहे.

सातारा : राज्यात फसवणूकीचे प्रमाण वाढले आहे. राज्यातील वेगवेगळ्या भागातून फसवणुकीच्या घटना उघडकीस येत असतात. अशातचं आता सातारा जिल्ह्यातून एक मोठी बातमी समोर आली आहे. आमच्याकडे स्कीममध्ये पैसे गुंतवल्यास रकमेच्या दुप्पट पैसे अथवा दुप्पट रकमेचे सोेने मिळेल, असे आमिष दाखवून ९ लाखांची फसवणूक केल्याचा प्रकार उघडकीस आला आहे. याप्रकरणी तिघांविरोधात सातारा शहर पोलीस ठाण्यात गुन्हा दाखल झाला आहे. धन्यकुमार गोरख माने, शरयू धन्यकुमार माने (रा. राजगुरुनगर, सध्या रा. संगमनगर खेड) व प्रतिक्षा सिद्धार्थ गडांकुश (रा. चिंचणेर, ता. सातारा) अशी गुन्हा दाखल झालेल्यांची नावे आहेत.

अनुराधा विशाल लोहार (वय २७, रा. अंबेवाडी, ता. सातारा) यांनी फिर्याद दिली आहे. दिनांक २१ ऑगस्ट ते ३ ऑक्टोबर २०२४ या कालावधीत खंडोबा मंदिराशेजारी असलेल्या स्टार इन्स्पायर ज्वेलर्स प्रा. लि. (गाळा नं. ३, पहिला मजला, इन्फिनिटी वन अपार्टमेंट, सातारा) या दुकानात हा फसवणुकीचा प्रकार घडला आहे. संशयितांनी लोहार यांना १० हजार रुपयांत ३ ग्रॅम सोन्याचा कॉईन अथवा २० हजार रुपये परतावा (कालावधी ५५ दिवस), ठेव म्हणून ठेवलेल्या पैशांवर ५ टक्के कॅशबॅक अशा विविध स्कीमचे अमिष दाखविले. तक्रारदार यांच्यासह अनेकांकडून ९ लाख १० हजार रुपये घेतले व त्याचा काहीच परतावा व रक्कमही परत केली नाही, असे फिर्यादीत म्हटले आहे. अधिक तपास सहायक निरीक्षक कांबळे करत आहेत.

दगड मारून केले जखमी

दरम्यान, याच प्रकरणातील संशयित धन्यकुमार माने, शरयू माने यांना आमच्या पैशांचे काय झाले, अशी विचारणा केल्याच्या कारणावरून त्यांनी तू कोण आम्हाला विचारणारी, असे म्हणत जमिनीवर पाडून दगड मारून व चावा घेऊन जखमी केल्याप्रकरणी व मैत्रिणींना शिवीगाळ करीत धमकी दिल्याप्रकरणी सातारा शहर पोलीस ठाण्यात दुसरा गुन्हा दाखल झाला आहे. अनुराधा लोहार यांनीच फिर्याद दिली आहे. दिनांक २० रोजी ५.३० च्या सुमारास बीएसएनएलच्या सातारा कार्यालयामागे असलेल्या बासुंदी हॉटेल समोर ही घटना घडली. पोलीस नाईक गोळे तपास करत आहेत.

कोथरुडमधील व्यक्तीला ३० लाखाला गंडा

कोथरूड भागातील एका नोकरदार व्यक्तीला सायबर चोरट्यांनी टास्क तसेच युट्यूबला लाईक्स मिळवून देण्यासाठी तसेच ऑनलाइन पद्धतीने कामाची संधी (ऑनलाइन टास्क) असल्याच्या आमिषाने २९ लाख ६३ हजार रुपयांना गंडा घातला आहे. याप्रकरणी अज्ञात चोरट्यांवर कोथरुड पोलिसांनी गुन्हा दाखल केला. याबाबत ५३ वर्षीय व्यक्तीने तक्रार दिली आहे. वरिष्ठ पोलीस निरीक्षक संदीप देशमाने तपास करत आहेत.