बुधवार, 19 ऑगस्ट 2026
घातपाताचा कट होता का? कल्याणजवळ कारमधून पिस्तूल-काडतुसे जप्त; रोशन गोंधळीला अटक
ठाणे LCBचे पोलीस अधिकारी भाऊसाहेब गायकवाड यांना बल्याणी परिसरात रोशन गोंधळीच्या कारमध्ये शस्त्रे असल्याची माहिती मिळाली होती. या माहितीच्या आधारे गुन्हे शाखेच्या पथकाने संबंधित कारवर लक्ष ठेवून तिची तपासणी केली. कारची झडती घेतली असता पोलिसांना दोन गावठी पिस्तूल आणि १० जिवंत काडतुसे आढळून आली. त्यानंतर रोशन गोंधळी आणि कृष्णा यादव या दोघांना ताब्यात घेण्यात आले.
तलावाभोवतीची अतिक्रमणे हटवा; प्रभावशाली व्यक्तींचीही गय करू नका, हायकोर्टाचे स्पष्ट निर्देश
गुन्हे शाखेने दोन्ही आरोपींना पुढील तपासासाठी टिटवाळा पोलिसांच्या ताब्यात दिले. टिटवाळा पोलिसांनी दोघांना कल्याण न्यायालयात हजर केले. न्यायालयाने दोन्ही आरोपींना तीन दिवसांची पोलीस कोठडी सुनावली आहे. पोलीस कोठडीत आरोपींकडून शस्त्रांबाबत अधिक माहिती मिळवण्याचा प्रयत्न केला जाणार आहे.
पोलिसांसमोर आता अनेक प्रश्न आहेत. ही पिस्तूल आणि काडतुसे आरोपींनी कोणाकडून खरेदी केली? ती नेमकी कशासाठी आणली होती? कोणत्या गुन्ह्यासाठी त्यांचा वापर होणार होता? तसेच या प्रकरणामागे आणखी कोणाचा सहभाग आहे का, याचा तपास केला जात आहे. टिटवाळा पोलीस ठाण्याचे पोलीस अधिकारी विशाल चोरगे या प्रकरणाचा पुढील तपास करत आहेत.
पोलिसांनी दिलेल्या माहितीनुसार, रोशन गोंधळी याच्याविरोधात यापूर्वीही अनेक गुन्हे दाखल असल्याची माहिती समोर आली आहे. त्यामुळे त्याच्या पूर्वीच्या गुन्हेगारी पार्श्वभूमीचाही तपास केला जात आहे. बल्याणी परिसरातून एकाच कारमध्ये दोन गावठी पिस्तूल आणि १० जिवंत काडतुसे सापडल्याने या प्रकरणाचे गांभीर्य वाढले आहे. मात्र, शस्त्रे नेमकी कोणत्या उद्देशाने आणली होती, हे पोलीस तपास पूर्ण झाल्यानंतरच स्पष्ट होणार आहे. या प्रकरणाचा तपास टिटवाला पोलीस स्टेशनचे वरिष्ठ पोलीस निरीक्षक मुकेश ढगे यांच्या मार्गदर्शनाखाली पोलीस अधिकारी विशाल चोरगे करीत आहेत.
