Ashok Kharat Case : खरातने अनेक महिलांवर केले अत्याचार; हेल्पलाईनवर खरातविरोधात तक्रारीच तक्रारी

एसआयटीने जारी केलेल्या ९५०३२७०२२४ आणि ७७७५८१६३८९ या हेल्पलाईन क्रमांकांमुळे पीडितांना पोलीस ठाण्याच्या पायऱ्या चढण्यापूर्वीच एक सुरक्षित व्यासपीठ मिळाले आहे.

नाशिक : स्वतःला आध्यात्मिक गुरू म्हणवून घेणाऱ्या अशोक खरात याच्या भोंदूगिरीचा आणि अत्याचाराचा मुखवटा आता पूर्णपणे फाटला आहे. विशेष तपास पथकाने (एसआयटी) सुरू केलेल्या हेल्पलाईनमुळे पीडितांसह खरातविरोधात माहिती देणाऱ्यांना सहज सोपे झाले आहे. दररोज ८ ते १० नवे कॉल्स येत असून, खरातच्या ‘काळ्या साम्राज्या’चे धागेदोरे आता पोलिसांच्या हाती लागत आहेत.

अनेक वर्षांपासून आध्यात्मिकतेच्या नावाखाली सुरू असलेला अन्याय आणि अघोरी कृत्यांचा पर्दाफाश करण्यासाठी स्थापन करण्यात आलेली एसआयटी आता अॅक्शन मोडमध्ये आली आहे. एसआयटीने जारी केलेल्या ९५०३२७०२२४ आणि ७७७५८१६३८९ या हेल्पलाईन क्रमांकांमुळे पीडितांना पोलीस ठाण्याच्या पायऱ्या चढण्यापूर्वीच एक सुरक्षित व्यासपीठ मिळाले आहे. यामुळेच खरातच्या दहशतीखाली वावरणाऱ्या पीडित महिला, फसवणूक झालेले व्यावसायिक आणि पूर्वाश्रमीचे भक्त आता न घाबरता समोर येत आहेत. खरातच्या कामकाजाची पद्धत आणि त्यामागची खळबळजनक रहस्ये या हेल्पलाईनद्वारे पोलिसांपर्यंत पोहोचत आहे.

खरातच्या दहशतीमुळे अनेक महिला तक्रार करण्यास धजावत नव्हत्या. मात्र, हेल्पलाईनच्या माध्यमातून पोलिसांनी पुढाकार घेत या महिलांचे समुपदेशन सुरू केले आहे. प्रत्येक कॉलची गांभीर्याने दखल घेऊन पीडितांना धीर दिला जात असल्याने तक्रारदारांचा आकडा आता डझनच्या पार जाण्याची शक्यता निर्माण झाली आहे.

मध्यस्थांचीही आता खैर नाही

तपासाची चक्रे आता केवळ खरातपुरती मर्यादित नसून, अनेक निष्पाप कुटुंबांना या भोंदूच्या दारात नेऊन सोडणाऱ्या ‘मध्यस्थांची’ ही चौकशी एसआयटीने सुरू केली आहे. सध्या पीडितांचे जबाब नोंदवण्याचे काम युद्धपातळीवर सुरू असून, ठोस पुरावे हाती लागताच या रॅकेटमधील मोठ्या माशांवर कारवाई करण्याचे संकेत पोलिसांनी दिले आहेत.

हेदेखील वाचा : Ashok Kharat : ‘तो सिद्धपुरुष आणि माझा गुरू’, ‘त्या’ आत्मचरित्रामध्ये अशोक खरातचा उल्लेख; पुस्तकात चमत्कारांचे दाखले

तपासाचा फास अधिक घट्ट

महिलांचे शोषण आणि अवैध संपत्तीच्या आरोपाखाली पोलिसांच्या जाळ्यात अडकलेल्या संशयित आरोपी अशोक खरात विरोधात आता तपासाचा फास अधिक घट्ट झाला आहे. या तपासादरम्यान सिन्नर येथील औद्योगिक वसाहतीतील उद्योजकांच्या संघटनेचे (स्टाईस) चेअरमन नामकणं आवारे आणि खरात यांच्यातील घनिष्ठ संबंधांचे धक्कादायक पुरावे समोर आले आहेत. विशेष म्हणजे खुद्द आवारेंनी लिहिलेल्या ‘असा मी नामकर्ण’ या आत्मचरित्रात खरातचा उल्लेख ‘सिद्धपुरुष’ आणि ‘गुरू’ असा केल्याने तसेच त्याच्या चमत्काराचे दाखले दिल्याने हे पुस्तक तब्बल १४ वर्षांनी चर्चेत आले आहे.