मंगळवार, 15 सप्टेंबर 2026
सौजन्य फोटो - सोशल मीडीया
बाबुराव लोहार यांचे राधानगरी रोडवरील जिवबानाना पार्क परिसरात ट्रक बॉडी तयार करण्याचे गॅरेज आहे. गॅरेजच्या मागे असलेल्या बंगल्यात ते कुटुंबासह राहत होते. ट्रकची बॉडी तयार करणे आणि दुरुस्तीच्या कामातील त्यांच्या कौशल्यामुळे पश्चिम महाराष्ट्रात त्यांची ओळख होती.
सोमवारी सकाळी नेहमीप्रमाणे लोहार चारचाकी वाहनातून श्री अंबाबाई मंदिरात दर्शनासाठी गेले होते. त्यानंतर त्यांनी बाबुजमाल दर्ग्यालाही भेट दिली. दर्शन आटोपल्यानंतर रंकाळा टॉवरमार्गे ते आपल्या घरी परतत होते. सकाळी सुमारे सहाच्या सुमारास खराडे महाविद्यालयासमोर त्यांच्या चारचाकी वाहनाला अज्ञात वाहनाने धडक दिल्याची प्राथमिक माहिती आहे.
अपघातावेळी झालेल्या मोठ्या आवाजामुळे रंकाळा परिसरात फिरण्यासाठी आलेल्या नागरिकांनी घटनास्थळी धाव घेतली. अपघातात लोहार यांच्या डोक्याला गंभीर दुखापत झाली होती. नागरिकांनी तत्काळ १०८ क्रमांकावर संपर्क साधून त्यांना उपचारासाठी सीपीआर रुग्णालयात दाखल केले.
सीपीआरमध्ये दाखल केल्यानंतर काही तरुणांनी लोहार यांना ओळखले. मात्र, डॉक्टरांनी तपासल्यानंतर उपचार सुरू करण्यापूर्वीच त्यांचा मृत्यू झाल्याचे सांगितले. त्यांच्या निधनामुळे ट्रक बॉडी तयार करण्याच्या क्षेत्रातील परिचितांमध्ये हळहळ व्यक्त होत आहे.
अपघातात लोहार यांच्या चारचाकीचे मोठे नुकसान झाले आहे. हा अपघात नेमका कसा झाला, धडक देणारे वाहन कोणते होते आणि चालकाची ओळख पटते का, याचा पोलिसांकडून तपास सुरू आहे. घटनेची नोंद जुना राजवाडा पोलिस ठाण्यात करण्यात आली आहे.
