हवाई दलाचा गणवेश मिळविण्याचा प्रयत्न; सलूनमध्ये काम करणाऱ्या एकाला ठोकल्या बेड्या

सलूनमध्ये काम करणाऱ्या एका तरुणाने हवाई दलातील मृत जवानाचे बनावट ओळखपत्र दाखवून हवाई दलाचा गणवेश शिवून घेण्याचा प्रयत्न केला आहे. हा प्रकार उघडकीस आल्यानंतर पोलिसांनी त्याच्याविरुद्ध गुन्हा दाखल करून अटक केली आहे.

पुणे : सलूनमध्ये काम करणाऱ्या एका तरुणाने हवाई दलातील मृत जवानाचे बनावट ओळखपत्र दाखवून हवाई दलाचा गणवेश शिवून घेण्याचा प्रयत्न केला आहे. हा प्रकार उघडकीस आल्यानंतर पोलिसांनी त्याच्याविरुद्ध गुन्हा दाखल करून अटक केली आहे. त्याच्याकडून बनावट ओळखपत्र जप्त करण्यात आले आहे. याप्रकरणी शुभम विलास अंबुरे (वय २६, रा. शिक्रापूर रस्ता, ता. शिरूर) असे अटक केलेल्याचे नाव आहे. याबाबत हवाई दलातील जवान ब्रिजेशकुमार मिश्रा (वय ४८) यांनी लोहगाव पोलिसांत तक्रार दिली आहे. ही घटना ६ जुलै रोजी लोहगाव येथील गुरुद्वारा कॉलनीजवळील एका टेलरच्या दुकानात उघडकीस आली आहे.

पोलिसांच्या माहितीनुसार, अंबुरे हा मूळचा बीड जिल्ह्यातील असून गेल्या तीन महिन्यांपासून शिक्रापूर येथील एका सलूनमध्ये काम करत आहे. त्याने हवाई दलातील मृत जवान रजत कुमार मिश्रा यांच्या नावाचे बनावट ओळखपत्र तयार केले होते. नंतर लोहगावमधील बालाजी टेलर्स येथे जाऊन आपणच रजत कुमार मिश्रा असल्याचे सांगत ते ओळखपत्र दाखवून हवाई दलाच्या जवानाचा गणवेश शिवण्यास दिला. दरम्यान, त्या टेलरकडे हवाई दलातील एक जवान आला असता, टेलरने अंबुरेने पाठविलेले ओळखपत्र त्याला दाखवले. ओळखपत्र पाहून संबंधित जवानाला संशय आला. चौकशी केल्यानंतर रजत कुमार मिश्रा यांचा २०२२ मध्ये अपघाती मृत्यू झाल्याचे समोर आले. त्यानंतर लोहगाव पोलिसांकडे तक्रार करण्यात आली.

हे सुद्धा वाचा : वाहतूक कोंडीत पुणे जगात पाचव्या क्रमांकावर; टॉमटॉम संस्थेचा अहवाल जाहीर

पोलिसांनी अंबुरेला ताब्यात घेऊन अटक केली आहे. अंबुरेविरुद्ध गुन्हा दाखल करण्यात आला असून त्याने हवाई दलाचा गणवेश का परिधान करण्याचा प्रयत्न केला, तसेच बनावट ओळखपत्र कसे तयार केले, याचा तपास सुरू आहे. वरिष्ठ पोलीस निरीक्षक मनीषा पाटील यांच्या मार्गदर्शनाखाली सहायक पोलीस निरीक्षक संतोष शिंदे तपास करत आहेत.

हे सुद्धा वाचा : ‘फटाका’ सायलेन्सरवाल्यांनो सावधान! पुणे पोलिसांचा धडाका, तीन दिवसांत तब्बल…