आधी मोबाईल फॉरमॅट केला अन् नंतर गळफास घेऊन आत्महत्या केली; दिघीत घडला धक्कादायक प्रकार

राहत्या घरात सीट बेल्टच्या सहाय्याने गळफास घेत आत्महत्येचा प्रयत्न केल्याची धक्कादायक घटना घडली. यावेळी घराचा दरवाजा आतून बंद असल्यामुळे सुरुवातीला घरातील सदस्यांना नेमके काय घडले आहे याची कल्पना आली नाही.

पिंपरी : दिघी परिसरातील गंगोत्री हॉस्पिटलजवळ राहणाऱ्या 19 वर्षीय तरुणाने राहत्या घरी गळफास घेऊन आत्महत्या केल्याची धक्कादायक घटना रविवारी रात्री घडली. अथर्व विजय देशमुख असे आत्महत्या केलेल्या तरुणाचे नाव आहे. मिळालेल्या माहितीनुसार, अथर्व हा गंगोत्री हॉस्पिटल परिसरात पार्वती भोजने यांच्या घरी भाड्याने राहत होता.

रविवारी सायंकाळी साडेसातच्या सुमारास त्याने राहत्या घरात सीट बेल्टच्या सहाय्याने गळफास घेत आत्महत्येचा प्रयत्न केल्याची धक्कादायक घटना घडली. यावेळी घराचा दरवाजा आतून बंद असल्यामुळे सुरुवातीला घरातील सदस्यांना नेमके काय घडले आहे याची कल्पना आली नाही. काही वेळ उलटूनही अथर्वकडून कोणताही प्रतिसाद मिळत नव्हता आणि दरवाजाही उघडला जात नव्हता. त्यामुळे त्याची आई ज्योती देशमुख यांना संशय आला. त्यांनी वारंवार आवाज देऊन अथर्वला हाक मारली. मात्र, आतून कोणताही प्रतिसाद मिळाला नाही.

हेदेखील वाचा : Beed Crime: धक्कादायक ! एका ५ वर्षीय चिमुरडीवर १६ वर्षीय अल्पवयीन मुलाने केले लैंगिक अत्याचार; आरोपी ताब्यात

यानंतर परिस्थिती संशयास्पद वाटू लागल्याने त्यांनी शेजाऱ्यांना बोलावून घेतले. शेजाऱ्यांच्या मदतीने घराच्या खिडकीतून आत डोकावून पाहण्याचा प्रयत्न करण्यात आला. त्यावेळी घरात काहीतरी गंभीर घडल्याचा अंदाज आल्याने खिडकीतून घराची कडी उघडण्यात आली आणि सर्वांनी आत प्रवेश केला. घरात प्रवेश केल्यानंतर अथर्व गळफास घेतलेल्या अवस्थेत दिसून आला. ही परिस्थिती पाहताच कुटुंबीय आणि शेजारी घाबरून गेले.

विलंबाशिवाय रुग्णालयात नेलं पण…

तातडीने त्याला खाली उतरवण्यात आले आणि कोणताही विलंब न करता जवळच्या गंगोत्री हॉस्पिटलमध्ये उपचारासाठी दाखल करण्यात आले. त्या ठिकाणी डॉक्टरांनी त्याच्यावर प्राथमिक उपचार करण्याचा प्रयत्न केला. मात्र, त्याची प्रकृती अत्यंत गंभीर असल्याचे लक्षात आल्याने डॉक्टरांनी त्याला पुढील उपचारासाठी पिंपरी येथील यशवंतराव चव्हाण रुग्णालयात हलवण्याचा सल्ला दिला. त्यानुसार त्याला तातडीने तेथे नेण्यात आले.

रुग्णालयात उपचारापूर्वी मृत्यू

रुग्णालयात पोहोचल्यानंतर डॉक्टरांनी सखोल तपासणी केली असता अथर्वचा आधीच मृत्यू झाल्याचे स्पष्ट झाले. त्यानंतर डॉक्टरांनी त्याला मृत घोषित केले. या घटनेमुळे कुटुंबीयांवर मोठा आघात झाला असून परिसरातही हळहळ व्यक्त केली जात आहे.

दिघी पोलिसांची तातडीने घेतली धाव

या घटनेची माहिती मिळताच दिघी पोलिसांनी घटनास्थळी धाव घेतली. पोलिसांनी घटनास्थळाचा पंचनामा करून आवश्यक ती नोंद केली असून, मृतदेह शवविच्छेदनासाठी पाठविण्यात आला आहे. अथर्वने आत्महत्या करण्यामागचे नेमके कारण अद्याप स्पष्ट झालेले नाही. मात्र, आत्महत्येपूर्वी त्याने आपला मोबाईल फोन फॉरमॅट केल्याची माहिती प्राथमिक तपासात समोर आली आहे. त्यामुळे या घटनेमागील कारणांचा शोध घेण्यासाठी पोलिसांकडून विविध अंगांनी तपास सुरू असून त्याच्या मोबाईलसह इतर बाबींचीही चौकशी करण्यात येत आहे.