Jalgaon Crime News: महिलेच्या गळ्याला सुरा अन् रोखली पिस्तूल (फोटो सौजन्य- सोशलमीडिया)
Jalgaon News: नशिराबाद येथील भादली रोडवरील मुक्तेश्वरनगर भागात बुधवारी रात्री साडेआठ वाजेच्या सुमारास एका पोलिस कर्मचाऱ्याच्या घरावर दोन अज्ञात सशख दरोडेखोरांनी दरोडा टाकण्याचा प्रयत्न केल्याची अत्यंत खळबळजनक घटना घडली. दरोडेखोरांनी पिस्तुल ताणून आणि गृहिणीच्या गळ्याला थेट सुरी लावून सोन्या-चांदीचे दागिने व रोकड लुटण्याचा प्रयत्न केला. मात्र, पोलिस कर्मचाऱ्याने दाखवलेले प्रसंगावधान आणि ‘डायल ११२’ या आपत्कालीन हेल्पलाइनवर साधलेला संपर्क यांमुळे मोठा अनर्थ टळला आहे.
मिळालेल्या सविस्तर माहितीनुसार, मुक्तेश्वरनगर भागातील रहिवासी आणि सध्या ठाणे जिल्ह्यातील डोंबिवली येथील विष्णूनगर पोलिस ठाण्यात कार्यरत असलेले पोलिस नाईक गणेश साहेबराव कोळी हे एका नातेवाईकाच्या निधनामुळे अंत्यसंस्कारासाठी नशिराबाद येथे आले होते. बुधवारी रात्री ८:३० वाजेच्या सुमारास कोळी कुटुंबीय घरात असताना अचानक दोन अज्ञात दरोडेखोरांनी घरात घुसखोरी केली. घरात शिरताच एका दरोडेखोराने गणेश कोळी यांच्या पत्नी सुनिता यांच्या गळ्याला थेट सुरा लावला, तर दुसऱ्याने हातातील रिव्हॉल्व्हर ताणून धरले. त्यांनी सोन्याचे दागिने आणि रोख रकमेची मागणी करत संपूर्ण कुटुंबाला जिवे मारण्याची धमकी दिली. Jalgaon Crime News:
घटनेच्या वेळी गणेश कोळी यांच्या अंगावर सोन्याचे दागिने व हातात अंगठ्या होत्या. दरोडेखोरांचे लक्ष आपल्याकडे जाण्यापूर्वीच त्यांनी अत्यंत चलाखीने स्वतःला घरातील बाथरूममध्ये कोंडून घेतले. यामुळे संतापलेल्या दरोडेखोरांनी बाथरूमचा दरवाजा तोडण्याचा जोरदार प्रयत्न सुरू केला. परिस्थिती अत्यंत बिकट आणि हाताबाहेर जात असल्याचे लक्षात येताच, कोळी यांनी घाबरून न जाता बाथरूममधूनच अत्यंत शांत डोक्याने ‘डायल ११२’ या पोलिस नियंत्रण कक्षाच्या क्रमांकावर संपर्क साधला व घडलेला संपूर्ण प्रकार पोलिसांना सांगितला.
पोलिस पथक मागावर असल्याचे समजताच दरोडेखोरांनी मन्यारखेडा शिवारातील अंधारात कार सोडून दिली आणि शेतातून अंधाराचा फायदा घेत पळ काढला. घटनेची माहिती मिळताच नशिराबाद पोलिस स्टेशनच्या सहाय्यक पोलिस निरीक्षक योगिता नारखेडे, पोलिस उपनिरीक्षक विजय कोळी, गुणवंत देशमुख, सागर बीडे, विठ्ठल मुंडे, प्रवीण लोहार, प्रशांत विरणारे, पंकज सोनवणे व भरत बाविस्कर यांनी तत्परता दाखवत मन्यारखेड शिवारातून सदर वाहन ताब्यात घेतले आहे.
याप्रकरणी नशिराबाद पोलिस ठाण्यात गुन्ह नोंदवण्याची प्रक्रिया सुरू असून, फरान दरोडेखोरांच्या शोधासाठी विविध भागात पथके रवाना करण्यात आली आहेत. पोलिस नाईक गणेश कोळी यांनी दाखवलेल्या अद्भुत समयसूचकतेचे व धैर्याचे परिसरात सर्वत्र कौतुक होत आहे.
माहिती मिळताच नियंत्रण कक्षाने नशिराबाद पोलिसांना अलर्ट केले. पोलिस घटनास्थळी पोहोचत असल्याची चाहूल लागताच दरोडेखोरांची घाबरगुंडी उडाली. बाथरूमचा दरवाजा तुटत नसल्याने आणि पोलिस पकडणार या भीतीने दरोडेखोरांनी घरातील टेबलवर पडलेली गणेश कोळी यांच्या कारची (एमएच ०५ सीक्यू ७१२१) चावी उचलली आणि ते कार घेऊन थेट भादली रोडने पोलिसांना गुंगारा देवून पसार झाले.
.png "Videos"){kind=small}
