'सॉरी मम्मी-पापा, पुढच्या जन्मी तुमच्यासाठी डॉक्टर नक्की बनेन'; नीटच्या विद्यार्थ्याची आत्महत्या
छत्रपती संभाजीनगर : जिल्ह्यातील वैजापूर तालुक्यातील खंडाळा येथे नीट परीक्षेची तयारी करणाऱ्या १९ वर्षीय विद्यार्थ्याने आत्महत्या केल्याची घटना समोर आली आहे. सूरज शिंदे असे मृत विद्यार्थ्याचे नाव आहे. नीट परीक्षेत अपेक्षेप्रमाणे गुण न मिळाल्याने सूरज निराश होता. याच नैराश्येतून त्याने हे टोकाचे पाऊल उचलल्याचा प्राथमिक अंदाज व्यक्त केला जात आहे.
सूरज घरीच नीटची तयारी करत होता. आत्महत्येपूर्वी त्याने आई-वडिलांच्या नावाने एक छोटी चिठ्ठी लिहिली होती. त्यात त्याने, ‘सॉरी मम्मी आणि पापा, पुढच्या जन्मी तुमच्यासाठी नक्की डॉक्टर बनेन. स्वतःची काळजी घ्या आणि आनंदी राहा,’ असे लिहिले होते. या चिठ्ठीतून डॉक्टर होण्याचे त्याचे स्वप्न आणि परीक्षेच्या निकालामुळे त्याच्यावर आलेला ताण स्पष्ट होत असल्याचे दिसून येते.
घटनेच्या वेळी घरात कोणीही नव्हते. गावात साप्ताहिक कार्यक्रम सुरू असल्याने कुटुंबातील सदस्य घराबाहेर गेले होते. दुपारी सुमारे दोन वाजता कुटुंबीय घरी परतले. त्यांनी सूरजला फोन केला; मात्र त्याचा फोन बंद होता. त्यानंतर त्याची लहान बहीण वरच्या खोलीत गेली असता सूरज बेशुद्धावस्थेत आढळला. बहिणीच्या आरडाओरडीनंतर कुटुंबातील इतर सदस्य तेथे धावून आले. सूरजला तातडीने वैजापूर उपजिल्हा रुग्णालयात नेण्यात आले. मात्र, डॉक्टरांनी तपासणीनंतर त्याला मृत घोषित केले.
कौटुंबिक वादातून विवाहितेची आत्महत्या
दुसऱ्या एका घटनेत, नंदीनी नावाच्या महिलेने आत्महत्या केली. नदीनीचा पती महेश व्यवसायाने आर्किटेक्ट आहे. दाम्पत्याला मुलगा आणि मुलगी आहे. मुलगा इंजिनिअरींगचे शिक्षण घेत आहे. पाच दिवसांपूर्वी पती-पत्नीत क्षुल्लक वाद झाला. नंदीनीने मनावर ताण घेतला. दोघांत अबोला आणि दुरावा वाढला. परंतु, तिला हे सहन झाले नाही. घटनेच्या दिवशी २३ जुलैला पती नेहमीप्रमाणे कामानिमित्त बाहेर होते. मुलगी शिकवणी वर्गाला गेली. तोपर्यंत मुलगा घरी आईशी बोलत होता. सासू घरातच होती. शिकवणी वर्ग सुटण्याची वेळ झाल्याने तो बहिणीला आणायला गेला. नंदिनीने बेडरूममध्ये ओढणीने गळफास लावून आपला जीवन प्रवास थांबवला.
.png "Videos"){kind=small}
