मंगळवार, 29 सप्टेंबर 2026
सौजन्य फोटो - AI Gemini
छत्रपती संभाजीनगर : जन्मानंतर आई-वडिलांच्या कुशीत सुरक्षितता मिळायला हवी असलेल्या अवघ्या एक महिन्याच्या बाळाची पैशांसाठी विक्री केल्याचा धक्कादायक प्रकार समोर आला आहे. लिव्ह-इन रिलेशनशिपमधून जन्मलेल्या या बाळाचा जन्मदात्यांनीच सौदा केल्याचे पोलिस तपासात समोर आले आहे. त्यानंतर दलालांच्या माध्यमातून बाळाचे आणखी व्यवहार झाल्याचे निष्पन्न झाले असून, अवघ्या ४८ तासांत बाळ चार हातांतून फिरल्याची माहिती आहे.
पोलिस तपासानुसार, बाळाच्या पहिल्या व्यवहारात १ लाख २० हजार रुपये देण्यात आल्याचे समोर आले आहे. या पैशांत महागडे मोबाईल आणि सोन्याचे दागिने खरेदी करण्यात आल्याचेही तपासात निष्पन्न झाल्याचे सांगण्यात येते. मात्र, पहिल्या व्यवहारानंतरही बाळाची विक्री थांबली नाही. बाळाला एका व्यक्तीकडून दुसऱ्या व्यक्तीकडे देण्यात आले आणि त्यानंतर त्याची किंमत वाढत गेली. या प्रकरणात बाळाचे तब्बल तीन व्यवहार झाल्याचे पोलिस तपासात समोर आले आहे. एका व्यवहारात तब्बल ३ लाख ७० हजार रुपयांची रक्कम समोर आली आहे. त्यामुळे बाळाची विक्री करणारे आणि त्याच्या व्यवहारात सहभागी असलेल्या व्यक्तींचा शोध घेण्यासाठी पोलिसांनी तपास सुरू केला आहे.
बाळाला छत्रपती संभाजीनगरपासून नांदेडमार्गे थेट तेलंगणापर्यंत नेण्यात आले. तब्बल ५०० किलोमीटरहून अधिक अंतराचा प्रवास अवघ्या दोन दिवसांत झाल्याचे तपासातून समोर आले आहे. या काळात बाळाच्या ताब्यात वारंवार बदल करण्यात आला. जन्मानंतर अवघ्या एका महिन्यातच बाळाला वेगवेगळ्या व्यक्तींकडे सोपवण्यात आले. या संपूर्ण प्रकारामुळे बालकांच्या सुरक्षिततेचा गंभीर प्रश्न पुन्हा ऐरणीवर आला आहे.
प्रकरणाचा तपास करताना पोलिसांनी बाळाच्या विक्रीत सहभागी असल्याचा संशय असलेल्या व्यक्तींना ताब्यात घेतले आहे. या व्यवहारातून सोन्या-दागिन्यांसह मोबाईल आणि इतर वस्तू खरेदी केल्याचेही समोर आले आहे. पोलिसांनी बाळाला सुरक्षितपणे परत आणले. त्यानंतर बाल कल्याण समितीच्या आदेशानुसार बाळाला संस्थेकडे सुपूर्द करण्यात आले आहे. बाळाच्या विक्रीत नेमके कोणकोण सहभागी होते, व्यवहारात किती व्यक्तींचा सहभाग आहे आणि या प्रकरणामागील संपूर्ण साखळी काय आहे, याचा तपास पोलिसांकडून सुरू आहे.
