एटीएम सेंटरमध्ये कार्डची अदलाबदल करून एकाची फसवणूक; तब्बल ४८ हजारांना घातला गंडा
पुणे : पुणे शहरात ज्येष्ठ नागरिकांना हेरून ते एटीएम केंद्रात पैसे काढण्यासाठी आल्यानंतर त्यांच्या पाठिमागून जात मदतीचा बहाण्याने त्यांची फसवणूक करणाऱ्या चोरट्यांचा उच्छाद सुरूच आहे. पुन्हा एकदा नवी पेठेतील शास्त्री रोड परिसरात एका नागरिकाला एटीएममध्ये पैसे काढण्यासाठी मदतीचा बहाणा केला. मात्र, पैसे निघत नाही म्हणून एटीएम कार्डाची अदलाबदल केली आणि नंतर कार्डचा गैरवापर करून तब्बल ४८ हजार रुपयांची रोख रक्कम काढून फसवणूक केल्याची घटना घडली आहे. याप्रकरणी बद्रीनाथ शांतीनाथ बनसोडे (वय ४५, रा. पानमळा वसाहत, सिंहगड रोड) यांनी विश्रामबाग पोलीस ठाण्यात तक्रार दिली आहे. त्यानूसार, पोलिसांनी अज्ञात व्यक्तीविरोधात गुन्हा दाखल केला आहे.
पोलिसांच्या माहितीनुसार, तक्रारदार हे ११ मे २०२५ रोजी सकाळी ११ वाजण्याच्या सुमारास शास्त्री रोडवरील एटीएममध्ये पैसे काढण्यासाठी गेले होते. पैसे निघत नसल्याने ते थोडे गोंधळले. त्याचवेळी उपस्थित एकाने त्यांना “या मशीनमधून पैसे निघत नाहीत, दुसऱ्या मशीनमधून निघतात, मी मदत करतो” असे सांगितले. त्यांचा विश्वासास संपादन करून त्यांच्याकडून एटीएम कार्ड घेतले. दुसऱ्या मशीनकडे वळल्याचा बनाव केला. परंतु त्याने त्यांच्या कार्डाची दुसऱ्या कार्डाशी अदलाबदल केली आणि मूळ कार्ड लंपास केले. नंतर काही वेळातच बनसोडे यांच्या खात्यातून ४८ हजार रुपये काढल्याचा मॅसेज आला. तेव्हा त्यांना हा प्रकार लक्षात आला. अधिक तपास पोलीस निरीक्षक खाडे यांच्या मार्गदर्शनाखाली सुरू आहे.
साडे चार लाखांची फसवणूक
डेबिट कार्ड अॅक्टिव्ह करायचे असल्याची बतावणी करून सायबर चोरट्यांनी ज्येष्ठ नागरिकाला साडे चार लाखांचा गंडा घातला आहे. याप्रकरणी ६७ वर्षीय ज्येष्ठ नागरिकाने चतु:श्रृंगी पोलिसांत तक्रार दिली आहे. त्यावरून अनोळखी व्यक्तींवर फसवणूकप्रकरणी गुन्हा नोंद केला आहे. तक्रारदारांना फोनद्वारे संपर्क करून सायबर चोरट्यांनी त्यांना बँकेतून मॅनेजर बोलत असल्याची बतावणी केली. त्यांना डेबिट कार्ड अॅक्टिव्ह करायचे आहे, असे सांगत एक लिंक पाठवली. नंतर लिंकवर माहिती भरण्यास सांगितली. माहिती भरताच सायबर चोरट्यांनी ऑनलाईनरित्या त्यांच्या खात्यातून चार लाख ४७ हजार रुपये काढून घेत त्यांची फसवणूक केली.
.png "Videos"){kind=small}
