गेस्ट हाऊसमध्ये मुक्कामाच्या आमिषाने फसवणूक करणाऱ्या टोळीचा पर्दाफाश; पोलिसांनी आरोपींना ठोकल्या बेड्या

पिंपरी-चिंचवड सायबर पोलिसांनी लोणावळा परिसरात ‘व्हिला/गेस्ट हाऊस’ मध्ये १० दिवस मुक्कामाचे आमिष दाखवून नागरिकाची तब्बल ४० लाख रुपयांची फसवणूक करणाऱ्या टोळीचा पर्दाफाश केला आहे.

पिंपरी : राज्यासह देशभरात फसवणुकीच्या घटनांमध्ये मोठी वाढ झाली आहे. दररोज चोरटे नागरिकांच्या लाखो रुपयांच्या ऐवजावर डल्ला मारत आहेत. अशातच आता एक मोठी बातमी समोर आली आहे. पिंपरी-चिंचवड सायबर पोलिसांनी लोणावळा परिसरात ‘व्हिला/गेस्ट हाऊस’ मध्ये १० दिवस मुक्कामाचे आमिष दाखवून नागरिकाची तब्बल ४० लाख रुपयांची फसवणूक करणाऱ्या टोळीचा पर्दाफाश केला आहे. या प्रकरणी चार आरोपींना अटक करण्यात आली असून, त्यांच्याकडून विविध बँक खात्यांचा आणि ऑनलाइन व्यवहारांचा तपास सुरू आहे.

 

सायबर पोलिसांनी दिलेल्या माहितीनुसार, फिर्यादीला सोशल मीडियावरून संपर्क साधत ‘व्हिला/गेस्ट हाऊस’मध्ये स्वस्त दरात राहण्याची ऑफर देण्यात आली. विश्वास संपादन करून आरोपींनी त्यांच्याकडून टप्प्याटप्प्याने मोठी रक्कम ट्रान्सफर करून घेतली. सुरुवातीला कमी रक्कम घेतल्यानंतर विविध कारणे सांगत अधिक पैसे उकळण्यात आले. अखेर एकूण सुमारे ४० लाख रुपये घेतल्यानंतर आरोपींनी संपर्क तोडला.

तक्रार प्राप्त होताच पिंपरी-चिंचवड सायबर पोलिसांनी तांत्रिक तपास सुरू केला. बँक व्यवहार, मोबाईल क्रमांक, IP अ‍ॅड्रेस आणि डिजिटल ट्रेलच्या आधारे आरोपींचा माग काढण्यात आला. त्यानुसार गुजरात आणि मध्यप्रदेश येथून चार जणांना अटक करण्यात आली आहे. अटक आरोपींमध्ये मोमील अतुलकुमार मोदी (24, रा. मेहसाणा, गुजरात), रवी प्रसाद जाट (21, रा. राजगड , मध्यप्रदेश), रुद्रपल चोहान (22, मध्यप्रदेश) आणि हंश वर्मा (19, रा. मुंबई ) यांचा समावेश आहे. आरोपी विविध बँक खात्यांद्वारे रक्कम फिरवत असल्याचे तपासात उघड झाले आहे.

या गुन्ह्यात ‘करंट अकाउंट’ आणि ऑनलाइन पेमेंट प्लॅटफॉर्मचा वापर करून पैशांचा माग काढणे कठीण करण्याचा प्रयत्न करण्यात आला होता. मात्र सायबर पोलिसांच्या दक्षतेमुळे ही टोळी उघडकीस आली आहे. पोलिसांनी नागरिकांना अशा ऑनलाइन ऑफर्सपासून सावध राहण्याचे आवाहन केले आहे. कोणत्याही अनोळखी लिंक, ऑफर किंवा व्यक्तीवर विश्वास ठेवू नये, तसेच पैसे ट्रान्सफर करण्यापूर्वी खात्री करावी, असेही सांगण्यात आले आहे. तपास सुरू असून आणखी आरोपींचा शोध घेतला जात आहे.

हे सुद्धा वाचा : यवत पोलिसांची मोठी कारवाई; घरफोडी करणारे अट्टल दरोडेखोर जेरबंद

पुणे शहरात सायबर चोरट्यांचा सुळसुळाट

पुण्यात सायबर चोरट्यांचा सुळसुळाट वाढत असून दोन वेगवेगळ्या प्रकरणांत नागरिकांची लाखो रुपयांची फसवणूक झाल्याचे उघडकीस आले आहे. कारवाईची भीती दाखवून एका तरुणाकडून ४ लाख ८१ हजार रुपये उकळल्याची घटना समोर आली आहे. तर शेअर बाजारात गुंतवणुकीच्या आमिषाने ज्येष्ठ नागरिकाची १७ लाख रुपयांची फसवणूक करण्यात आली आहे. या दोन्ही प्रकरणांत संबंधित पोलीस ठाण्यांमध्ये गुन्हे दाखल करण्यात आले आहेत.