शनिवार, 17 ऑक्टोबर 2026
सौजन्य - नवराष्ट्र टीम
पुणे : राज्यात चोरट्यांनी धुमाकूळ घातला असून, राज्यातील वेगवेगळ्या भागातून चोरीच्या घटना उघडकीस येत असतात. असातचं आता पुण्यातून एक मोठी बातमी समोर आली आहे. नगर रस्त्यावरील एक मोठे बंद गोदाम फोडून त्यातील २५ लाखांच्या तांब्याच्या तारा चोरून पसार झालेल्या टोळीला वाघोली पोलिसांनी बेड्या ठोकल्या आहेत. चोरट्यांकडून ६ लाख ४० हजार रुपयांच्या तांब्याच्या तारा तसेच टेम्पो असा २४ लाख ४० हजार रुपयांचा मुद्देमाल जप्त केला आहे.
राजेंद्र मोतीचंद जैन (वय ५२, रा. माणकेश्वर बिल्डींग, मुंबई), विनोद श्रीपाल जैन (वय ४०, रा. कामाठीपूरा, मुंबई), सोहेल फिरोज शेख (वय २२, रा. रे रोड, मुंबई) अशी अटक केलेल्यांची नावे आहेत. अतिरिक्त पोलीस आयुक्त मनोज पाटील, सहायक आयुक्त प्रांजली सोनवणे यांच्या मार्गदर्शनाखाली वरिष्ठ निरीक्षक युवराज हांडे, उपनिरीक्षक वैजीनाथ केदार व त्यांच्या पथकाने ही कारवाई केली आहे.
वाघोली-लोहगाव रस्त्यावरील जैन वेअर हाऊस, रिमश्री कॉपर इंडिया प्रा. लि. या गोदामाचे कुलूप तोडून चोरट्यांनी २५ लाख रुपयांच्या तांब्याच्या तारा चोरून नेल्याची घटना २८ फेब्रुवारी रोजी घडली होती. तांब्याच्या तारा चोरुन आरोपी टेम्पोतून पसार झाले होते. याप्रकरणी वाघोली पोलीस ठाण्यात गुन्हा दाखल करण्यात आला होता. वाघोली पोलीस ठाण्यातील तपास पथकाकडून आरोपींचा माग काढण्यात येत होता. पोलिसांनी जवळपास १७२ ठिकाणचे सीसीटीव्ही चित्रीकरण तपासले होते. तांत्रिक तपास, तसेच सीसीटीव्ही चित्रीकरणावरुन पोलिसांनी आरोपींचा माग काढला. आरोपी जैन आणि शेख यांच्याकडून सहा लाख ४० हजार रुपयांच्या तांब्याच्या तारा आणि १८ लाख रुपयांचा टेम्पो जप्त केला.
मोबाईल चोरणाऱ्या दोघांना ठोकल्या बेड्या
पुणे शहरातील स्वारगेट बसस्थानक, पुणे स्टेशनचा परिसर त्यासोबतच वाकडेवाडी बस स्थानकाच्या आवारातून गर्दीत आलेल्या प्रवाशांचे मोबाईल चोरी करणार्‍या दोन चोरट्यांना स्वारगेट पोलिसांनी सापळा रचून बेड्या ठोकल्या आहेत. चोरट्यांकडून १ लाख ८० हजार रुपये किंमतीचे १२ मोबाईल जप्त करण्यात आले आहेत. तुषार अविंता लोखंडे (वय २०), गणेश संजय पोकळे (वय २३, रा. दोघेही. पाटील इस्टेट शिवाजीनगर) अशी अटक केलेल्या दोघांची नावे आहेत. ही कारवाई पोलीस उपायुक्त स्मार्तना पाटील, वरिष्ठ निरीक्षक युवराज नांद्रे यांच्या मार्गदर्शनाखाली उपनिरीक्षक रविंद्र कस्पटे, अशोक पाटील, पोलीस हवालदार अश्रुबा मोराळे, हर्षल शिंदे, कर्मचारी प्रशांत टोणपे, सुजय पवार यांच्या पथकाने केली आहे.
