बनावट सोन्याचा व्यवहार उघडकीस; फसवणूक करण्याच्या तयारीत असलेल्या तीन जणांना ठोकल्या बेड्या

बनावट सोन्याची बिस्किटे विक्रीस आणून तब्बल ५० लाखांची फसवणूक करण्याच्या तयारीत असलेल्या तीन जणांना पोलिसांनी ताब्यात घेतले आहे. कराड शहर परिसरातील गजानन हौसिंग सोसायटी येथे ही कारवाई करण्यात आली आहे.

कराड : राज्यात फसवणुकीच्या घटनांमध्ये मोठी वाढ झाली आहे. दररोज वेगवेगळ्या भागातून फसवणुकीच्या घटना उघडकीस येत असतात. फसवणुकीचे प्रमाण रोखण्यासाठी पोलिसांकडूनही प्रयत्न केले जात आहेत. अशातच आता कराडमधून एक मोठी बातमी समोर आली आहे. बनावट सोन्याची बिस्किटे विक्रीस आणून तब्बल ५० लाखांची फसवणूक करण्याच्या तयारीत असलेल्या तीन जणांना पोलिसांनी ताब्यात घेतले आहे. कराड शहर परिसरातील गजानन हौसिंग सोसायटी येथे ही कारवाई करण्यात आली आहे.

बनावट सोन्याच्या व्यवहाराचा मोठा प्रकार उघडकीस आला आहे. एका सोनाराने दाखवलेली सतर्कता व पोलिसांच्या वेळीच हस्तक्षेपामुळे तीन जणांना पोलिसांनी पकडले आहे. गोविंद एकनाथराव पदातुरे (रा. अहमदपूर, जि. लातूर), सर्जेराव आनंदा कदम (रा. पिसाद्री, कोल्हापूर) व अधिक आकाराम गुरव (रा. म्हासुर्णे, खटाव) अशी याप्रकरणी पोलिसांनी अटक केलेल्यांची नावे आहेत.

पोलिसांनी दिलेल्या माहितीनूसार, आसिफ अकबर मुल्ला हे शहरातील मुजावर कॉलनीत राहण्यास असून त्यांचे ‘रॉयल ज्वेलर्स’ नावाचे सोन्या-चांदीचे दुकान आहे. मंगळवारी रात्री साडेसातच्या सुमारास एकजण दुकानात आला. त्याने त्याचे नाव गोविंद पदातुरे असल्याचे सांगून, माझ्याकडे चोवीस कॅरेटचे ५०० ग्रॅम शुद्ध सोने आहे, ते मला विकायचे असल्याचे सांगितले. पदातुरे याने त्याच्याकडील बिस्किटांपैकी एक बिस्कीट पांढर्‍या प्लास्टिक पिशवीतून काढून आसिफ मुल्ला यांना दाखवले. हे बिस्किट पाहताक्षणीच खरे वाटल्याने मुल्ला यांना संशय आला. त्याचवेळी गोविंदने आपल्या मित्राच्या घरी गजानन हौसिंग सोसायटी येथे व्यवहार करू, असे सुचवले. असिफ मुल्ला यांना संशय आल्यामुळे त्यांनी गोविंदची नजर चुकवून कराड शहर पोलिस ठाण्यातील कर्मचारी मोमीन यांना याबाबत माहिती दिली.

गजानन हौसींग सोसायटीत सापळा रचला

पोलिसांनी तातडीने याची दखल घेत उपनिरीक्षक सांडगे यांना कारवाईसाठी पाठवले. असिफ मुल्ला गोविंदसोबत गजानन हौसींग सोसायटी येथे गेले. त्याठिकाणी सर्जेराव कदम व अधिक गुरव उपस्थित होते. तीन जणांनी मिळून बनावट सोन्याच्या १० बिस्किटांचा व्यवहार सुमारे ५० लाख रुपयांना रोख रक्कमेत करण्याची बोलणी सुरू केली. याचवेळी पोलिस निरीक्षक निलेश तारु, उपनिरीक्षक निखिल मगदुम, पोलीस नाईक संतोष पाडळे, शिपाई अमोल देशमुख, दिग्विजय सांडगे, मुकेश मोरे, संग्राम पाटील यांनी छापा टाकून तिघांना ताब्यात घेतले.

बनावट ११ बिस्किटे सापडली

पंच आणि सोनार यशवंत देवकर यांच्या उपस्थितीत तिघांची झडती घेण्यात आली. झडतीमध्ये त्यांच्या खिशातून बनावट सोन्याची ११ बिस्किटे सापडली. पोलिसांनी गोविंद पदातुरे, सर्जेराव कदम आणि अधिक गुरव यांना ताब्यात घेतले असून, फसवणुकीचा गुन्हा नोंदविण्यात आला आहे. याप्रकरणी पोलीस उपनिरीक्षक चव्हाण यांच्यासह पथक तपास करीत आहे.