अंगात दैवी शक्ती असल्याचा दावा, महिलेला स्वारगेटमधील लॉजवर बोलावले अन्...; आणखी एका भोंदूचा संतापजनक प्रकार
पुणे : पुन्हा सांस्कृतिक शहरात आणखी एका भोंदूने अंगात दैवीशक्तीचा संचार असल्याची बतावणी करुन महिलेवर बलात्कार केल्याची घटना उघडकीस आली आहे. कौटुंबिक वादात तोडगा काढण्याचे आमिष दाखवून भोंदूने महिलेवर बलात्कार केला तसेच महिलेची ५० लाखांची फसवणूक केली आहे. याप्रकरणी एका भोंदूविरुद्ध पोलिसांनी गुन्हा दाखल केला आहे. नाशिकमधील अशोक खरात तसेच पुण्यातील ऋषीकेश वैद्य प्रकरण ताजे असतानाच आणखी हे एक प्रकरण समोर आले आहे.
याप्रकरणी ओैंदुबर मनोहर गडदे (वय ४३, रा. तरटगाव, ता. पंढरपूर, जि. सोलापूर) याच्यावर गुन्हा दाखल करण्यात आला आहे. याबाबत ४२ वर्षीय महिलेने स्वारगेट पोलिस ठाण्यात तक्रार दिली आहे. त्यानुसार, गडदे याच्यावर गुन्हा दाखल केला आहे.
पोलिसांच्या माहितीनुसार, पीडित महिलेचे पतीशी पटत नव्हते. त्यांच्यात कौटुंबिक वाद झाले. त्यामुळे ती वेगळी राहत होती. महिलेची पाच वर्षांपूर्वी एका व्यक्तीमार्फत गडदे याच्याशी ओळख झाली. तेव्हा गडदेने देवऋषी असल्याची बतावणी महिलेकडे केली. माझ्या अंगात दैवीशक्तीचा संचार आहे, अशी बतावणी त्याने केली. कौटुंबिक समस्या दूर करतो, असे सांगून त्याने महिलेला जाळ्यात ओढले.
महिलेला स्वारगेट परिसरातील एका लॉजवर बोलावून तिच्यावर बलात्कार केला. नंतर त्याने महिलेला माणगाव परिसरात बोलावून तेथील एका लॉजवर बलात्कार केला. महिलेला नोकरी तसेच बांधकाम व्यवसायात गुंतवणूक करण्याचे आमिष दाखवून आरोपी गडदेने तिच्याकडून वेळोवेळी ५० लाख ५५ हजार रुपये उकळले. काही रक्कम रोख स्वरुपात घेतली तसेच महिलेकडून दागिने घेतले. गेले पाच ते सहा वर्ष हा प्रकार सुरू होता. फसवणूक झाल्याचे लक्षात आल्यानंतर महिलेने पोलिसांकडे तक्रार दिली. अधिक तपास उपनिरीक्षक पाटील करत आहेत.
गेल्याच आठवड्यात दैवीशक्तीचा संचार असल्याची बतावणी करून एका महिलेवर बलात्कार केल्याप्रकरणी ऋषीकेश श्रीकांत वैद्य (वय ३९, रा. वसई, जि. पालघर) याला अटक करण्यात आली होती. सध्या तो न्यायालयीन कोठडीत आहे. त्यानंतर हे प्रकरण समोर आले आहे.
हे सुद्धा वाचा : ऑक्टोबर-2025 ची नुकसान भरपाई मदत रखडली; शिरूर तालुक्यात शेतकऱ्यांचा आंदोलनाचा इशारा
.png "Videos"){kind=small}
