कँटीनमध्ये 74 लाखांचा अपहार, हवालदाराला ठोकल्या बेड्या; ‘असा’ झाला प्रकार उघडकीस

पोलिसांना स्वस्तात वस्तू खरेदी करता यावी, यासाठी सुरू केलेल्या ‌‘संस्कृती सबसिडीअर कँटीनमध्ये ७४ लाखांचा अपहार झाल्याचे चौकशीत समाेर आले आहे.

• कँटीनमध्ये 74 लाखांचा अपहार
• हवालदाराला ठोकल्या बेड्या
• ‘असा’ झाला प्रकार उघडकीस

सांगली : पोलिसांना स्वस्तात वस्तू खरेदी करता यावी, यासाठी सुरू केलेल्या ‌‘संस्कृती सबसिडीअर कँटीनमध्ये ७४ लाखांचा अपहार झाल्याचे चौकशीत समाेर आले आहे. याबाबत कॅन्टीन व्यवस्थापक, हवालदार भूपेश भीमराव चांदणे (वय ४२, रा. अयोध्यानगर, संजयनगर, सांगली) याला संजयनगर पोलिसांनी अटक केली आहे. त्याला न्यायालयासमोर हजर केले असता पाच दिवसांची पोलिस कोठडी मिळाली आहे. याबाबत पोलिस कल्याण शाखेचे तत्कालीन निरीक्षक प्रवीणकुमार कांबळे यांनी फिर्याद दिली होती.

पोलिसांनी दिलेली माहितीनुसार, तत्कालीन पोलिस निरीक्षक दिलीप सावंत यांनी साधारण दहा वर्षांपूर्वी पोलिसांसाठी कॅन्टीन सुरू केले होते. कॅन्टीनमध्ये स्वस्तात किराणा माल व वेगवेगळ्या वस्तू विक्री होत होत्या. त्यामुळे कॅन्टीनला चांगला प्रतिसाद मिळत होता. किराणा मालासह वेगवेगळ्या इलेक्ट्रॉनिक्स व इलेक्ट्रिकल्स वस्तूंची देखील विक्री होत होती. कॅन्टीनचा व्यवस्थापक असलेल्या हवालदार चांदणे याने साधारणपणे तीन वर्षांपासून कॅन्टीनमध्ये गैरव्यवहार सुरू केला.

लेखापरीक्षणात उघड झाला प्रकार

लेखापरीक्षक विश्वेश देशपांडे ॲन्ड कंपनीने एक एप्रिल २०२३ ते ३१ मार्च २०२४ या वर्षाचे लेखापरीक्षण केले. तेव्हा सुपरवायझर अकाऊंट कॅश आणि नफ्यात १९ लाख ८० हजारांची तफावत आढळली. स्टॉकमधील तफावत ४ लाख ४८ हजार रुपये, सुपरवायझर डेटर्समध्ये २० लाख ८० हजार रुपये अशी एका वर्षात ४५ लाख ८ हजार ७५५ रुपयांची तफावत आढळली. एक एप्रिल २०२४ ते ३१ मार्च २०२५ या वर्षात २८ लाख ९४ हजार ८१२ रुपयांची तफावत आढळून आली.

पोलिस कल्याण विभागास अहवाल सादर

दोन वर्षांत ७४ लाख ३ हजार ५६७ रुपयांची तफावत आढळल्याचा अहवाल लेखापरीक्षक देशपांडे यांनी पोलिस कल्याण विभागास दिला. पोलिस कल्याणचे तत्कालीन निरीक्षक कांबळे यांनी हा अहवाल पोलिस अधीक्षक संदीप घुगे यांना सादर केला. अधीक्षक घुगे यांनी ३० मे २०२५ रोजी याबाबत चौकशीचे आदेश दिले. अधीक्षक घुगे यांनी व्यवस्थापक चांदणेवर गुन्हा दाखल करण्याचे आदेश दिले. त्यानुसार गुन्हा नोंद करण्यात आला. त्याला अटक करण्यात आली आहे.