संग्रहित फोटो
सासवड : माळशिरस येथील नीलम गायकवाड या युवतीचा तिच्याच गावातील मित्राने खानवडीच्या गायरानात अत्यंत निर्घुणपणे खून केल्याचे उघड झाल्यानंतर माळशिरस गावच्या नागरिकांनी तीव्र संताप व्यक्त केला होता. त्यानंतर दुसऱ्याच दिवशी गावात ग्रामसभा घेवून घटनेचा निषेध करून आरोपीला फाशी देण्याची मागणीही करण्यात आली. घटनेचा भोर उपविभागीय अधिकारी राजेंद्रसिंह गौर स्वतः तपास करीत आहेत. मात्र गावात ग्रामसभा झाल्याची माहितीच जेजुरी पोलिसांकडून मिळाली नसल्याचे स्वतः गौर यांनी सांगितले आहे. त्यातूनच जेजुरी पोलिसांच्या कारभारावर प्रश्नचिन्ह उपस्थित करण्यात आले आहे.
१ एप्रिल रोजी आरोपी अनिकेत जाधव या आरोपीने त्याची मैत्रीण नीलम गायकवाड हि कॉलेज वरून घरी परतत असताना सायंकाळी साडेपाच च्या सुमारास गोड बोलून खानवडी जवळील गायरान क्षेत्रात नेले. तिथे गेल्यावर तिच्यावर बलात्कार केला. तसेच तिला अज्ञात फोन आला असता तिच्यावर संशय घेवून तिथे हाताने आणि लाथाबुक्क्याने मारहाण करून आणि गळा दाबून निर्घुणपणे खून केला. त्यानंतर आरोपी स्वतःहून जेजुरी पोलिसांत हजर झाला. यानंतर खुनाची घटना उघडकीस आली.
दरम्यान खुनाची घटना उघडकीस येताच माळशिरस ग्रामस्थांनी या घटनेचा तीव्र निषेध केला. यावेळी आरोपीच्या घरासमोरच अंत्यविधी करण्याची ग्रामस्थांनी भूमिका घेतली. यावेळी सासवड- माळशिरस या रस्त्यावर काहीकाळ तणावही निर्माण झाला होता. त्यानंतर दुसऱ्याच दिवशी ग्रामस्थांनी गाव बंद ठेवून घटनेचा जोरदार निषेध केला. आरोपीसह त्याच्या वडिलांवर गुन्हा दाखल करून सहआरोपी करण्याची मागणीही केली. यावेळी जेजुरीचे सहायक पोलीस निरीक्षक आणि इतर कर्मचारी उपस्थित होते. मात्र सासवड मध्येच उपविभागीय पोलीस अधिकाऱ्यांचे कार्यालय असून, राजेंद्रसिंह गौर स्वतः तपास करीत आहेत. मात्र गावातील परिस्थितीची माहितीच नसल्याचे त्यांनी सांगितले आहे. तसेच माहिती का दिली नाही ? याबाबतही त्यांनी प्रश्न उपस्थित केला आहे.
यावेळी बोलताना पोलीस अधिकारी राजेंद्रसिंह गौर यांनी संपूर्ण घटनेचा क्रम सांगितला आहे. सायंकाळी ५ वाजता कॉलेज सुटल्यानंतर आरोपी अनिकेत जाधव नीलम गायकवाडला घेऊन ५. ३० वाजता खानवडी जवळील गायरानमध्ये आला. तिथे तिच्यावर बलात्कार करून तिची हत्या केली. हत्या केल्यानंतर ती मृत झाल्याची खात्री झाल्यानंतर तिच्या मृतदेहाशेजारी बसून होता. त्यानंतर काही वेळाने मृतदेहास मुंग्या लागण्यास सुरुवात झाल्यानंतर रात्री ९. वाजता आरोपी त्याच्या दुचाकीवरून जेजुरीकडे निघाला. रात्री ९ ३० वाजता जेजुरी पोलीस ठाण्यात पोहोचल्यानंतर पोलिसांना हकीकत सांगितली. रात्री ९. ४५ वाजता पोलीस आरोपीला घेवून निघाले आणि रात्री १०.१५ च्या दरम्यान घटनास्थळावर पोहचले. त्यानंतर सासवड पोलिसांना माहिती देण्यात आली. सासवड पोलीस तिथे पोहोचताच रुग्णवाहिका बोलावून मृतदेह सासवडच्या ग्रामीण रुग्णालयात आणण्यात आला. त्यानंतर युवतीच्या कुटुंबियांना संपर्क करून त्यांना बोलाविण्यात आले.
…त्यांचीही चौकशी करण्यात येणार
आरोपी अनिकेत जाधव आणि नीलम गायकवाड बोलत असताना नीलमला एक फोन आला. त्यानंतर काही वेळातच नीलमची अनिकेत याने हत्या केली. तसेच नीलमची हत्या केल्यानंतर आरोपीने संबंधित फोन करणाऱ्या व्यक्तींना फोन करून दमबाजी केल्याचे तपासात दिसून आले आहे. त्यामुळे आरोपीने कोणाला फोन केले याची माहिती घेण्यात आली असून, त्यांचीही चौकशी करण्यात येणार आहे. अशी माहिती भोर उपविभागीय पोलीस अधिकारी राजेंद्रसिंह गौर यांनी दिली आहे.
