जुन्नर तालुक्यात मध्यरात्री टोळक्याचा धुमाकूळ, वाहनांची तोडफोड; महिलेलाही मारहाण

जुन्नर तालुक्यातील वडगाव कांदळी हद्दीतील भोरवाडी (पवार मळा) येथे मंगळवार, दिनांक १२ रोजी मध्यरात्री १२ च्या सुमारास १० ते ११ जणांच्या टोळक्याने हातात कोयते घेऊन एका घरावर तुफान दगडफेक करत वाहनांची तोडफोड केल्याची धक्कादायक घटना घडली आहे.

• जुन्नर तालुक्यात टोळक्याचा धुमाकूळ
• टोळक्याने घराबाहेरील वाहनांची तोडफोड केली
• घरातील महिलेलाही मारहाण केली

नारायणगाव : जुन्नर तालुक्यातील वडगाव कांदळी हद्दीतील भोरवाडी (पवार मळा) येथे मंगळवार, दिनांक १२ रोजी मध्यरात्री १२ च्या सुमारास १० ते ११ जणांच्या टोळक्याने हातात कोयते घेऊन एका घरावर तुफान दगडफेक करत वाहनांची तोडफोड केल्याची धक्कादायक घटना घडली आहे. या घटनेत घरातील महिलेला मारहाण करून कुटुंबीयांना जिवे मारण्याची धमकी देण्यात आली आहे. याप्रकरणी नारायणगाव पोलीस ठाण्यात प्रसाद चिंतामण हिंगे याच्यासह अन्य अनोळखी व्यक्तींविरोधात गुन्हा दाखल करण्यात आला असल्याची माहिती सहायक पोलीस निरीक्षक प्रवीण संपांगे यांनी दिली.

 

परिसरात प्रचंड घबराट व खळबळ, पोलिसांकडून घटनेचा तपास सुरू

या हल्ल्यादरम्यान फिर्यादीचे पती प्रशांत रजपूत यांनी जमावातील एका हल्लेखोराला ओळखले असून, त्याचे नाव प्रसाद चिंतामण हिंगे (रा. खोडद, गडाचीवाडी, ता. जुन्नर) असल्याचे समोर आले आहे. मध्यरात्री कोयते उगारून झालेल्या या प्राणघातक हल्ल्यामुळे आणि तोडफोडीमुळे भोरवाडी परिसरात प्रचंड घबराट व खळबळ उडाली आहे. हा हल्ला नेमका कोणत्या पूर्ववैमनस्यातून किंवा कारणावरून करण्यात आला, तसेच जमावातील इतर अनोळखी इसम कोण होते, याचा शोध पोलीस घेत आहेत. या प्रकरणाचा पुढील तपास नारायणगाव पोलीस ठाण्याचे सहायक पोलीस निरीक्षक प्रवीण संपांगे यांच्या मार्गदर्शनाखाली पोलीस हवालदार तळपाडे करत आहेत.

हे सुद्धा वाचा : ‘छत्रपती’चा गळीत हंगाम सुरू, ११ लाख टन ऊस गाळपाचे उद्दिष्ट; सभासदांसह गेटकेन ऊसालाही समान दर देण्याची ग्वाही

अश्लील शिवीगाळ करत जीवे मारण्याची धमकी 

याबाबत मिळालेल्या सविस्तर माहितीनुसार, फिर्यादी रितिका प्रशांत रजपूत (वय २२ वर्षे, व्यवसायः शेती, रा. भोरवाडी, ता. जुन्नर, जि. पुणे) या आपल्या कुटुंबीयांसह घरी असताना मंगळवारी मध्यरात्री अचानक १० ते ११ जणांचे टोळके हातात कोयते घेऊन घरासमोर आले. या टोळक्याने परिसरात दहशत माजवत घरावर जोरदार दगडफेक सुरू केली. या दगडफेकीत घरावरील सिमेंटचे पत्रे फुटून मोठे नुकसान झाले. तसेच घराच्या आवारात उभ्या असलेल्या दोन वाहनांची टोळक्याने बेसुमार तोडफोड केली. यावेळी गोंधळ ऐकून बाहेर आलेल्या रितिका रजपूत यांच्या कानाखाली टोळक्यातील एकाने मारहाण केली, तसेच संपूर्ण कुटुंबाला अश्लील शिवीगाळ करत जीवे ठार मारण्याची धमकी दिली.