Crime News: पुणे पोलीस भरतीत कुराशच्या बनावट प्रमाणपत्रांचा खेळ; १९ जणांवर बडतर्फीची कारवाई

पुणे शहर पोलीस दलाच्या भरती प्रक्रियेत खेळाडूंच्या पाच टक्के आरक्षणाचा गैरफायदा घेत कुराशच्या बनावट प्रमाणपत्रांच्या आधारे १९ जणांनी नोकरी मिळवल्याचा प्रकार उघडकीस आला आहे. या सर्वांना बडतर्फ करण्याची प्रक्रिया सुरू असून, प्रशिक्षण घेत असलेल्या नऊ जणांनाही तातडीने परत बोलावण्यात आले आहे.

• कुराशच्या बनावट प्रमाणपत्रांवर पुणे पोलीस दलात १९ जणांची भरती
• १९ जणांवर बडतर्फीची कारवाई; प्रशिक्षणातील नऊ जणांना परत बोलावले
• कुराश असोसिएशनच्या पदाधिकाऱ्यांसह चौघांना अटक; १९ संघटनांची चौकशी

पुणे: राज्य सरकारच्या खेळाडूंसाठी असलेल्या पाच टक्के आरक्षणाचा गैरफायदा घेत पुणे शहर पोलीस दलात भरती झालेल्या १९ उमेदवारांनी ‘कुराश’ या खेळाची बनावट प्रमाणपत्रे सादर केल्याचा धक्कादायक प्रकार समोर आला आहे. या सर्व १९ उमेदवारांना पोलीस दलातून बडतर्फ करण्यात येणार असल्याची माहिती पोलीस आयुक्त अमितेशकुमार यांनी दिली. या प्रकरणाचा तपास पुणे पोलिसांच्या गुन्हे शाखेकडून सुरू असून, बनावट प्रमाणपत्रांचे संपूर्ण रॅकेट उघड करण्यासाठी तपासाची व्याप्ती वाढवण्यात आली आहे.

प्रशिक्षण घेत असलेल्या नऊ जणांनाही परत बोलावले

बनावट प्रमाणपत्रांच्या आधारे भरती झालेल्या १९ उमेदवारांपैकी १० जणांना अद्याप सेवेत हजर करून घेण्यात आले नव्हते. तर उर्वरित नऊ जणांना विविध पोलीस प्रशिक्षण केंद्रांमध्ये प्रशिक्षणासाठी पाठवण्यात आले होते. मात्र प्रकरण उघडकीस आल्यानंतर या नऊ जणांनाही तातडीने प्रशिक्षण केंद्रातून परत बोलावण्याचे आदेश देण्यात आले आहेत.

सजग नागरिकाच्या माहितीने बोगसगिरीचा पर्दाफाश

पुणे शहर पोलीस दलाच्या २०२४-२६ मधील भरती प्रक्रियेदरम्यान कुराश आणि ड्रॅगनबोट या खेळांची बनावट प्रमाणपत्रे वापरून १९ उमेदवार भरती झाल्याची गुप्त माहिती एका सजग नागरिकाने पोलिसांना दिली. त्याने संबंधित पुरावेही पोलिसांकडे सादर केले. त्यानंतर पोलिसांनी या प्रकरणाची सखोल चौकशी सुरू केली.

हेही वाचा: Crime News: ‘पोलिस अधिकारी आहे’ म्हणत धमकी; ऑनलाइन गेममधील मैत्रीचा इंजिनिअरला बसला फटका

दहा वर्षे स्पर्धाच नाहीत, तरी कागदोपत्री आयोजन

पोलिसांच्या तपासात २०१६ ते २०२६ या दहा वर्षांच्या कालावधीत कुराश खेळाच्या प्रत्यक्ष कोणत्याही स्पर्धा आयोजित न करताच त्या झाल्याचे कागदोपत्री दाखवण्यात आल्याचे समोर आले. त्यानंतर याच बनावट कागदपत्रांच्या आधारे प्रमाणपत्रे तयार करण्यात आल्याचे तपासात निष्पन्न झाले आहे.

कुराश असोसिएशनच्या पदाधिकाऱ्यांसह चौघांना अटक

या प्रकरणाचा अधिक तपास करत गुन्हे शाखेने महाराष्ट्र राज्य कुराश असोसिएशनचे अध्यक्ष अंकुश नागर आणि सचिव शिवाजी साळुंखे यांच्यासह चार जणांना अटक केली आहे. यामध्ये क्रीडा प्रशिक्षण केंद्र चालवणाऱ्या व्यक्तींचाही समावेश आहे. याच केंद्रांवर बनावट प्रमाणपत्रे तयार केली जात असल्याचा गंभीर आरोप आहे. या प्रकरणी वरिष्ठ निरीक्षक दीपक लगड यांच्या फिर्यादीवरून शिवाजीनगर पोलीस ठाण्यात गुन्हा दाखल करण्यात आला आहे.

हेही वाचा: Accident News: दारूच्या नशेत भरधाव कार अन् दुचाकींना धडक; कोथरुडच्या एमआयटी रस्त्यावर नेमकं काय घडलं?

१९ संघटनांची माहिती पोलिसांच्या हाती

या संपूर्ण प्रकरणाची व्याप्ती मोठी असल्याचे तपासातून समोर येत आहे. कुराश खेळाच्या तालुका, जिल्हा आणि राज्यस्तरीय स्पर्धांचे आयोजन करणाऱ्या १९ संघटनांची माहिती गुन्हे शाखेने संकलित केली आहे. या संघटना चालवणाऱ्या संशयित पदाधिकाऱ्यांचीही कसून चौकशी करण्यात येणार आहे. बनावट प्रमाणपत्रे तयार करणे आणि त्यांचा वापर करून पोलीस भरती मिळवण्याच्या या प्रकरणात आणखी काही जणांचा सहभाग असल्याचा पोलिसांना संशय आहे. या रॅकेटमध्ये सहभागी असलेल्या इतर व्यक्तींची चौकशी करून त्यांच्यावरही लवकरच कठोर कायदेशीर कारवाई केली जाणार असल्याची माहिती वरिष्ठ पोलीस अधिकाऱ्यांनी दिली.