गुरुवार, 1 ऑक्टोबर 2026
सौजन्य फोटो - AI Gemini
पुणे : पुणे शहरातून तडीपार केल्यानंतरही सराईत गुन्हेगारांची मुजोरी सुरूच असल्याचे पुन्हा एकदा समोर आले आहे. तडीपारीचा आदेश धुडकावून शहरात छुप्या पद्धतीने वावरणाऱ्या एका सराईत गुन्हेगाराने चक्क पत्नीच्या मदतीने दुचाकी चोरी केल्याचा प्रकार खडक पोलिसांनी उघडकीस आणला. या प्रकरणी पोलिसांनी तडीपार आरोपी वसीम सलीम पटेल (४२, रा. कोंढवा) याला ताब्यात घेतले आहे.
भवानी पेठेतील किराड आळी येथून २१ सप्टेंबरच्या रात्री एका नागरिकाची दुचाकी चोरीला गेली होती. याप्रकरणी खडक पोलीस ठाण्यात वाहनचोरीचा गुन्हा दाखल करण्यात आला होता. पोलिसांकडून या चोरीचा तपास सुरू असताना सहाय्यक पोलीस उपनिरीक्षक विनोद शिंदे आणि पोलीस अंमलदार हेमंत पेरणे यांना गोपनीय बातमीदारामार्फत आरोपीबाबत माहिती मिळाली.
मिळालेल्या माहितीच्या आधारे वरिष्ठ पोलीस निरीक्षक धनंजय पिंगळे यांच्या मार्गदर्शनाखाली पोलिसांनी कोंढवा परिसरात छापा टाकला. या कारवाईत वसीम पटेल याला ताब्यात घेण्यात आले. चौकशीत त्याने पत्नीच्या मदतीने दुचाकी चोरी केल्याची माहिती दिल्याचे पोलिसांनी सांगितले. त्यामुळे तडीपार असतानाही तो शहरात लपून राहत असल्याचे समोर आले.
वसीम पटेल हा पोलिसांच्या रेकॉर्डवरील सराईत गुन्हेगार असल्याचे पोलिसांनी सांगितले. पुणे शहरातील विविध पोलीस ठाण्यांमध्ये त्याच्याविरुद्ध चोरी, दरोडा, मारामारी यांसह तब्बल १४ गंभीर गुन्हे दाखल आहेत. त्याच्या गुन्हेगारी कारवायांना आळा घालण्यासाठी कोंढवा पोलिसांनी २०२५ मध्ये त्याला पुणे शहर, पिंपरी-चिंचवड आणि पुणे जिल्हा या कार्यक्षेत्रातून तडीपार केले होते. मात्र, तडीपारीच्या आदेशाचा भंग करून तो पुन्हा शहरात लपून राहत असल्याचे तपासात समोर आले आहे. पोलिसांकडून या प्रकरणाचा पुढील तपास सुरू असून, चोरीच्या दुचाकीसह त्याच्या पत्नीच्या भूमिकेबाबतही तपास केला जात आहे.
