Raigad Crime: नगरसेविकेच्या पतीची निर्घृण हत्या, CCTVने उघड केली थरारक वारदात; राजकीय आरोप-प्रत्यारोपांनी महाराष्ट्रात खळबळ

रायगडमध्ये नगरसेविकेचे पती निलेश काळोखे यांची भरदिवसा निर्घृण हत्या झाली. मुलांना शाळेत सोडून येताना ५–६ जणांनी तलवार, कोयत्याने २७ वार केले. CCTV समोर आल्यानंतर प्रकरणाला राजकीय वळण लागले आहे.

• मुलांना शाळेत सोडून येताना निलेश काळोखे यांच्यावर प्राणघातक हल्ला
• तलवार, कोयते, दगडांनी २७ वार; जागीच मृत्यू
• हत्या प्रकरणात राजकीय आरोप; १० जणांवर गुन्हे दाखल

रायगड: रायगड जिल्ह्यात झालेला नगरसेविकेच्या पतीच्या खुनाने सगळा महाराष्ट्र हादरला आहे. निलेश काळोखे यांच्या हत्येचा सीसीटीव्ही आता समोर आला आहे. हा जर वीडियो पहिला तर तुमच्या अंगावर काटा येईल एवढ्या भयानक पद्धतीने निलेश काळोखे यांचा खून करण्यात आला आहे. या हत्या प्रकरणात थेट आता राजकीय आरोप प्रत्यारोप केले जात आहेत. ते म्हणजे शिवसेना शिंदे गटाने थेट अजित पवारांच्या राष्ट्रवादीच्या नेत्यांवर आरोप केल्याने खळबळ उडाली आहे. नुकत्याच झालेल्या नगरपरिषद निवडणुकीत निलेश काळोखे यांची पत्नी निवडून आली होती. त्याचा राग मनात धरून हत्या करण्यात आली का? हा संशय मंत्री भरत गोगावले यांनी व्यक्त केला होता. काल राज्याचे उप मुख्यमंत्री एकनाथ शिंदे यांनी निलेश काळोखे यांच्या घरी भेट देत या हत्येमधील आरोपींना सोडणार नसल्याच सांगितल.

मुलीला शाळेत सोडून येत असताना वाटेत गाठून केला हल्ला!

निलेश काळोखे हे आपल्या मुलांना सोडायला शाळेत गेले होते. मुलांना शाळेत सोडून येत असताना ५ ते ६ जण मागून आले आणि काही कळण्याच्या आतच त्यांनी वार करायला सुरुवात केली. बाजूला रस्त्यावर पडलेलं दगड, तलवारी, कोयते यांनी जवळपास अंगावर २७ वार केले आणि त्यात निलेश काळोखे यांचा खून करण्यात आला. हल्ला एवढा भयानक होता की जागेवरच त्यांचा मृत्यू झाला. हॉस्पिटलला नेण्याच्या आतच त्यांनी जागेवर जीव सोडला.

सुनील तटकरे यांच्या सहकाऱ्यावर गंभीर आरोप

सुनील तटकरे यांच्या पक्षातील लोकांवर गंभीर आरोप करण्यात आले आहेत. या प्रकरणात मुख्य आरोपी रविंद्र देवकर आणि दर्शन देवकर यांना अटक करण्यात आली आहे. एकनाथ शिंदे यांनी सांगितलं की या प्रकरणात आम्ही कोणाला सोडणार नाही. कडक शिक्षा दिली जाईल. सुनील तटकरे यांनी सांगितलं की या प्रकरणात एस आय टी स्थापन करून चौकशी केली तरी चालेल. या प्रकरणाची एस आय टी मार्फत चौकशी करावी. या प्रकरणात राष्ट्रवादीचे जिल्हाध्यक्ष सुधाकर घारे यांच्यासह १० जणांवर गुन्हे दाखल करण्यात आले आहेत.