लग्न ठरलं, दुसऱ्याच दिवशी बघण्याचा कार्यक्रम; क्रिकेट खेळताना ३५ वर्षीय तरुणाचा अचानक मृत्यू, रत्नागिरीत हळहळ

आयुष्याच्या नव्या प्रवासाला सुरुवात होणार होती, लग्न ठरलं होतं आणि सोमवारी घरी मुलीकडची मंडळीही येणार होती. मात्र, या आनंदाच्या क्षणाआधीच चवंडे कुटुंबावर दुःखाचा डोंगर कोसळला. मित्रांसोबत क्रिकेट खेळताना अचानक चक्कर येऊन ३५ वर्षीय स्मित चवंडे कोसळला. रुग्णालयात दाखल करण्यापूर्वीच त्याचा मृत्यू झाला. या घटनेमुळे रत्नागिरीत हळहळ व

• लग्नाच्या तयारीत असतानाच काळाचा घाला
• क्रिकेट खेळताना चक्कर येऊन कोसळला
• उपचारांपूर्वीच ३५ वर्षीय तरुणाचा मृत्यू

 

रत्नागिरी : आयुष्याच्या नव्या प्रवासाला सुरुवात होण्यापूर्वीच एका तरुणाचा दुर्दैवी अंत झाल्याची हृदयद्रावक घटना रत्नागिरीत घडली आहे. लग्न ठरलेल्या ३५ वर्षीय स्मित नरेंद्र चवंडे याचा मित्रांसोबत क्रिकेट खेळताना अचानक चक्कर येऊन मृत्यू झाला. सोमवारी, १९ ऑक्टोबर रोजी त्याच्या घरी मुलीकडची मंडळी बघण्याच्या कार्यक्रमासाठी येणार होती. मात्र, त्याच्या मृत्यूमुळे चवंडे कुटुंबावर दुःखाचा डोंगर कोसळला आहे.

क्रिकेट खेळताना अचानक कोसळला

ही दुर्दैवी घटना रविवार, १८ ऑक्टोबर रोजी सकाळी रत्नागिरी शहरातील गाडीतळ परिसरातील लक्ष्मी चौक येथे घडली. स्मित चवंडे हा सकाळी मित्रांसोबत क्रिकेट खेळण्यासाठी गेला होता. खेळ सुरू असतानाच त्याला अचानक चक्कर आली आणि तो जमिनीवर बेशुद्ध होऊन कोसळला. स्मित अचानक कोसळल्याने त्याच्या मित्रांमध्ये घबराट पसरली. त्याचा मित्र युगेश सावंत याने तातडीने स्मितचा भाऊ सुशांत चवंडे यांना फोन करून घटनेची माहिती दिली. त्यानंतर स्मितला तातडीने रत्नागिरीतील एका खासगी रुग्णालयात दाखल करण्यात आले. मात्र, उपचार सुरू होण्यापूर्वीच त्याचा मृत्यू झाल्याचे वैद्यकीय अधिकाऱ्यांनी घोषित केले.

हेही वाचा: बहिणीला घटस्फोट दिल्याचा राग, मेव्हण्याची हत्या करून मृतदेह रेल्वे रुळांवर फेकला; २८ वर्षांनी मुख्य आरोपीला अटक

सोमवारी घरी येणार होती मुलीकडची मंडळी

स्मितचे अलीकडेच लग्न ठरले होते. त्यामुळे कुटुंबात आनंदाचे वातावरण होते. लग्नाच्या पुढील प्रक्रियेतील महत्त्वाचा भाग असलेला बघण्याचा कार्यक्रम सोमवारी, १९ ऑक्टोबर रोजी आयोजित करण्यात आला होता. यासाठी मुलीकडची मंडळी घरी येणार होती. मात्र, या आनंदाच्या क्षणाच्या आदल्याच दिवशी स्मितचा मृत्यू झाला. ज्या घरात लग्नाची तयारी आणि नव्या आयुष्याची स्वप्नं रंगत होती, तिथे आता शोककळा पसरली आहे. स्मितच्या अकाली निधनामुळे कुटुंबीयांसह मित्रपरिवारालाही मोठा धक्का बसला आहे.

मृत्यूचे नेमके कारण अद्याप अस्पष्ट

स्मित चवंडे हा रत्नागिरीतील चतंडेवठार येथे राहत होता. तो खंडाळा येथील अर्थन बँकेत कामाला होता. त्याच्या पश्चात आई-वडील आणि विवाहित बहीण असा परिवार आहे. या घटनेची माहिती त्याचा भाऊ सुशांत चवंडे यांनी रत्नागिरी शहर पोलिसांना दिली. याप्रकरणी शहर पोलीस ठाण्यात आकस्मिक मृत्यूची नोंद करण्यात आली आहे. क्रिकेट खेळताना स्मितला अचानक चक्कर का आली आणि त्याचा मृत्यू नेमका कशामुळे झाला, हे अद्याप स्पष्ट झालेले नाही. पोलीस या घटनेची नोंद घेऊन पुढील कार्यवाही करत आहेत.