Crime News: लग्नाचे आश्वासन देत तरुणीवर अडीच वर्षे लैंगिक अत्याचार; लग्नाची मागणी करताच मारहाण

‘पत्नीला घटस्फोट देऊन तुझ्याशीच लग्न करेन’ या आश्वासनाने सुरू झालेल्या नात्याचा शेवट धक्कादायक झाला. लग्नासाठी तगादा लावताच तरुणीला मारहाण करून नकार दिल्याचा आरोप झाल्यानंतर प्रकरण पोलिसांत पोहोचले.

• लग्नाचे आमिष; तरुणीचे शोषण
• घटस्फोटाचे आश्वासन अन् फसवणूक
• लग्नाचा तगादा लावताच मारहाण

छत्रपती संभाजीनगर : पत्नीला घटस्फोट देऊन आपल्याशी लग्न करणार असल्याचे आश्वासन देत एका २५ वर्षीय तरुणीचे वारंवार लैंगिक शोषण केल्याचा आरोप समोर आला आहे. लग्नासाठी तगादा लावल्यानंतर आरोपीने तरुणीला मारहाण करून लग्न करण्यास नकार दिल्याचे तक्रारीत नमूद आहे. या प्रकरणी पीडितेच्या तक्रारीवरून सलून व्यावसायिक वनेश्वर फकीरराव पंडित (रा. पिसादेवी) याच्याविरुद्ध सिडको पोलिस ठाण्यात फसवणूक आणि बलात्काराचा गुन्हा दाखल करण्यात आला आहे. पीडित तरुणी मार्च २०२३ पासून आरोपीच्या सलूनमध्ये ब्युटीशियन म्हणून काम करत होती. त्यावेळी दोघांची ओळख झाली. जानेवारी २०२४ मध्ये आरोपीने तरुणीकडे लग्नाची मागणी घातल्याचे तक्रारीत म्हटले आहे. मात्र, आरोपी विवाहित असल्याचे समजल्यानंतर तरुणीने त्याला याबाबत जाब विचारला. त्यावेळी आरोपीने आपण लवकरच पत्नीला घटस्फोट देणार असून, त्यानंतर तरुणीशीच लग्न करणार असल्याचे आश्वासन दिल्याचा आरोप आहे. या आश्वासनावर विश्वास ठेवून तरुणी आरोपीच्या संपर्कात राहिली. त्यानंतर आरोपीने तिच्याशी वारंवार शारीरिक संबंध ठेवले आणि त्यातून तिचे लैंगिक शोषण केल्याचे तक्रारीत नमूद करण्यात आले आहे.

हेही वाचा:Crime News: नातेवाइकासोबत बोलल्याचा राग अनावर; विभक्त पत्नीला धमकी देत तिचे केस कापून मध्यरात्री…

भागीदारी तोडल्यानंतरही त्रास

कालांतराने आरोपीच्या वर्तनाबाबत तरुणीला संशय येऊ लागला. आपली फसवणूक होत असल्याचे लक्षात आल्यानंतर जून २०२६ मध्ये तिने आरोपीसोबतची व्यावसायिक भागीदारी संपुष्टात आणली. त्यानंतर तिने आरोपीपासून अंतर ठेवण्यास सुरुवात केली. मात्र, त्यानंतरही आरोपी तिच्या सलूनमध्ये वारंवार येत असल्याचा आरोप आहे. ‘माझे तुझ्यावरच प्रेम आहे,’ असे सांगून तो भावनिक दबाव आणत असल्याचे तक्रारीत म्हटले आहे. आरोपीकडून वारंवार संपर्क साधण्याचा प्रयत्न होत असल्याने तरुणी त्रस्त झाली होती. दरम्यान, आपल्याशी लग्न करण्याचे दिलेले आश्वासन पूर्ण करावे, अशी मागणी तरुणीने आरोपीकडे केली. मात्र, लग्नाचा विषय काढल्यानंतर आरोपीने तिला मारहाण केल्याचा आरोप आहे. त्यानंतर त्याने लग्न करण्यास स्पष्ट नकार दिल्याचेही तक्रारीत नमूद आहे.

हेही वाचा:Pune Accident: खेळता खेळता काळाचा घाला;आई-वडिलांसमोरच पावणेदोन वर्षांच्या मुलीचा करुण अंत 

सिडको पोलिसांत गुन्हा दाखल

या प्रकारानंतर त्रस्त झालेल्या तरुणीने सिडको पोलिस ठाण्यात धाव घेत तक्रार दाखल केली. तिच्या तक्रारीवरून पोलिसांनी वनेश्वर फकीरराव पंडित याच्याविरुद्ध भारतीय न्याय संहितेतील संबंधित कलमांनुसार फसवणूक आणि बलात्काराचा गुन्हा दाखल केला आहे. दरम्यान, या प्रकरणातील आरोपांची पोलिसांकडून पडताळणी सुरू असून, आरोपी आणि पीडितेच्या संपर्कातील पुरावे, घटनाक्रम तसेच इतर संबंधित बाबींचा तपास केला जात आहे. या प्रकरणाचा पुढील तपास सिडको पोलिस करीत आहेत.