सदाशिव पेठेतील अपघातप्रकरणी मोठी अपडेट; तपासातून वाहनचालकाबाबत धक्कादायक माहिती उघड

सदाशिव पेठेतील भावे हायस्कूलसमोर चहाच्या हॉटेलसमोर १२ जणांना धडक देणाऱ्या मद्यपी वाहनचालकाची येरवडा कारागृहात रवानगी करण्यात आली आहे.

पुणे : सदाशिव पेठेतील भावे हायस्कूलसमोर चहाच्या हॉटेलसमोर १२ जणांना धडक देणाऱ्या मद्यपी वाहनचालकाची येरवडा कारागृहात रवानगी करण्यात आली आहे. न्यायालयाने त्याला १४ दिवसांची न्यायालयीन कोठडी सुनावली होती. वाहन चालकाने मद्यपान केले होते. त्याला कार चालवता येत नाही, असे पोलीस तपासातून पुढे आले आहे. त्याच्याकडे वाहन परवाना नसल्याचे समोर आले आहे.

जयराम शिवाजी मुळे (वय २७, रा. बिबवेवाडी, मूळ रा. मुळज ता. उमरगा, जि. धाराशिव) असे कारागृहात रवानगी करण्यात आलेल्या कारचालकाचे नाव आहे. तर अपघातावेळी कारमध्ये असलेला सहप्रवासी राहुल गोसावी (वय २७) आणि मोटार मालक दिगंबर शिंदे (वय २७) यांना तपासासाठी हजर राहण्याची नोटीस पाठवून देत सोडण्यात आले आहे.

पोलिसांनी शनिवारी मुळेसह गोसावी आणि शिंदेला ताब्यात घेतले होते. त्यांचे जबाब नोंदविण्यात आले आहेत. याबाबत मुळेवर विश्रामबाग पोलिसांत गुन्हा दाखल करण्यात आला आहे.

सदाशिव पेठेतील भावे हायस्कूलसमोरून छत्रपती राजाराम मंडळाकडे जाणाऱ्या गल्लीत चहाचे हॉटेल आहे. शनिवारी (ता.३१) सायंकाळी भरधाव कारने चहा प्यायला थांबलेल्या १२ जणांना धडक दिली. या अपघातात तीन जणांना गंभीर दुखापत झाली आहे. त्यांच्यावर खासगी रुग्णालयात उपचार सुरू आहोत. तर इतरांना उपचार घेऊन घरी पाठविण्यात आले आहे.

मुळे याने मद्यपान करून कार चालवत १२ जणांना उडविले आहे. या अपघातात बाराही जण जखमी झाले असून, काही जण स्पर्धा परीक्षेचा अभ्यास करणारे विद्यार्थी आहेत. त्यातील काहींची आज परिक्षा होती. या गुन्ह्याच्या पुढील तपासासाठी त्याला पोलिस कोठडी देण्यात यावी, असा युक्तिवाद सरकारी वकिलांनी केला. दोन्ही पक्षांचा युक्तिवाद ऐकून घेत न्यायालयाने मुळे याला न्यायालयीन कोठडी सुनावत त्याची रवानगी येरवडा कारागृहात केली. या गुन्ह्याचा तपास पोलीस उपनिरीक्षक गणेश फडतडे करत आहेत.

हे सुद्धा वाचा : सोलापुरात अपघात! आजीच्या डोळ्यादेखत ६ वर्षीय नातवाला दुचाकीने उडवलं, जागीच मृत्यू