दुचाकीच्या अपघातात सख्ख्या भाऊ-बहिणीचा मृत्यू
पिंपरी : देवदर्शनावरून परत येताना भावा-बहिणीच्या दुचाकीला पाठीमागून वेगात येणाऱ्या दुसऱ्या दुचाकीने धडक दिली. या अपघातात दुचाकीवरील भाऊ आणि बहिणीचा मृत्यू झाला. ही घटना जुना पुणे-मुंबई महामार्गावर हॉटेल पुना गेट समोर घडली. कौशिक रवी मुल्या (वय २१), ऋषिता रवी मुल्या (वय १७, भोसरी) अशी मृत्यू झालेल्या भाऊ बहिणीचे नाव आहे.
वरिष्ठ पोलीस निरीक्षक विक्रम बनसोडे यांनी दिलेल्या माहितीनुसार, कौशिक आणि ऋषिता हे दोघे रविवारी सोमाटणे फाटा येथील घोरवडेश्वर मंदिर येथे दर्शनासाठी गेले होते. रात्री नऊ वाजताच्या सुमारास ते दुचाकीवरून घरी परतत होते. जुन्या पुणे-मुंबई महामार्गाने येत असताना पुना गेट हॉटेल जवळ आल्यानंतर त्यांच्या दुचाकीला पाठीमागून वेगात आलेल्या दुचाकीने (एमएच १४ एनसी ०९७४) धडक दिली. या अपघातात कौशिक आणि ऋषिता हे दोघेही गंभीर जखमी झाले.
दोघांना तात्काळ उपचारासाठी वायसीएम रुग्णालयात दाखल करण्यात आले. मात्र, उपचारादरम्यान रविवारी रात्री उशिरा कौशिक याचा तर सोमवारी ऋषिता हिचा मृत्यू झाला. आकुर्डी येथील खासगी कॉलेजमध्ये कौशिक हा दुसऱ्या वर्षाला तर ऋषिता ही अकरावी इयत्तेत शिकत होते.
देहूरोड पोलिसांनी आरोपीची दुचाकी जप्त केली आहे. या भीषण अपघातात आरोपी देखील जखमी झाला असण्याची शक्यता आहे. त्यामुळे रुग्णालयांमध्ये चौकशी करून त्याचा शोध घेतला जात आहे. देहूरोड पोलीस तपास करत आहेत. भोसरी येथील प्रसिद्ध टेलर व्यावसायिक रवी मुल्या यांची ही मुले होती. सख्ख्या भावंडांचा अपघाती बळी गेल्याने शहरात हळहळ व्यक्त केली जात आहे.
म्हसवड-शिंगणापूर मार्गावर अपघाताचा थरार
माण तालुक्यातील म्हसवड–शिंगणापूर रस्त्यावरील भवानी टेक (राजेमाने यांचा मळा) येथे दोन इर्टिका कारची समोरासमोर जोरदार धडक होऊन भीषण अपघात झाला. या अपघातात दोन्ही कारमधील सहा प्रवासी जखमी झाले असून, दोन्ही वाहनांचे मोठ्या प्रमाणात नुकसान झाले आहे. अपघातग्रस्त इर्टिका कारपैकी एक कार वरकुटे-म्हसवड येथील बनवस्तीवरील, तर दुसरी कार पिलीव (ता. माळशिरस) येथील असल्याची माहिती मिळाली आहे.
.png "Videos"){kind=small}
