ओव्हरटेक करताना टेम्पोची कारला धडक; वृद्धाचा मृत्यू
पिंपरी : भरधाव वेगातील टेम्पोने समोरच्या वाहनाला ओव्हरटेक करण्याच्या नादात कारला जोरदार धडक दिली. या भीषण अपघातात कारमधील वृद्धाचा मृत्यू झाला असून, चालक गंभीर जखमी झाला आहे. ही घटना शुक्रवारी (दि.२८) पहाटे पावणेचार वाजण्याच्या सुमारास शिक्रापूर-चाकण रस्त्यावरील साबळेवाडी येथे घडली.
तात्यासाहेब बाबूराव पवार (वय ७८) असे मृत्यू झालेल्या व्यक्तीचे नाव आहे. या प्रकरणी प्रथमेश काळूराम मोहिते (वय २१, खेड) यांनी चाकण पोलीस ठाण्यात फिर्याद दिली आहे. त्यानुसार अकील फारुख शेख (वय २६, औरंगाबाद) या टेम्पो चालकाच्या विरोधात गुन्हा दाखल करण्यात आला आहे. आरोपी टेम्पो चालकाने वाहतुकीच्या नियमांकडे दुर्लक्ष करून भरधाव वेगाने वाहन चालवत समोरील वाहनाला ओव्हरटेक करण्याचा प्रयत्न केला. त्यावेळी समोरून येणाऱ्या कारला टेम्पोने जोरदार धडक दिली.
या धडकेत कार चालक सुरज सिंग गंभीर जखमी झाला, तर कारमधील रुग्ण तात्यासाहेब बाबूराव पवार यांच्या छातीला व हाताला गंभीर दुखापत झाली. त्यांना रुग्णालयात दाखल केले असता डॉक्टरांनी उपचारापूर्वीच मृत घोषित केले. चाकण पोलीस तपास करीत आहेत.
सिमेंट मिक्सरच्या धडकेत १४ वर्षीय मुलाचा जागीच मृत्यू
दुसऱ्या एका घटनेत, दहिसर टोल नाक्याजवळ गोदावरी लॉजसमोर सोमवारी दुपारी सुमारे एकच्या सुमारास झालेल्या भीषण अपघातात १४ वर्षीय मुलाचा जागीच मृत्यू झाला. सौरभ विश्वकर्मा असे मृत मुलाचे नाव असून, तो आपल्या वडिलांसोबत दुचाकीवरून शाळेतून घरी जात असताना मागून आलेल्या भरधाव सिमेंट मिक्सर ट्रकने त्यांच्या दुचाकीला धडक दिल्याची प्राथमिक माहिती आहे. या दुर्घटनेत सौरभच्या वडिलांनाही दुखापत झाली आहे.
अपघातात दोन महिलांचा दुर्दैवी अंत
बारामती एमआयडीसी परिसरात गुरुवारी दुपारी झालेल्या भीषण अपघाताने काळजाचा ठोका चुकविला. पियाजिओ कंपनी ते फेरेरो कंपनीदरम्यान भरधाव मोटारीने दुचाकीला जोरदार धडक दिल्याने दुचाकीवरील दोन महिलांचा दुर्दैवी मृत्यू झाला. अवघ्या काही क्षणांत झालेल्या या अपघाताने दोन कुटुंबांवर दुःखाचा डोंगर कोसळला असून, पिंपरद (ता. फलटण, जि. सातारा) गावावर शोककळा पसरली आहे.
.png "Videos"){kind=small}
