Thane Crime: ठाण्यात नात्याला काळिमा; धमकीमुळे तरुणी गप्प, पाच-सहा महिने भावांकडून वारंवार अत्याचार अन्...
मिळालेल्या माहितीनुसार, पीडित तरुणीवर तिच्याच तीन चुलत भावांकडून ठाण्यातील कोपरी आणि कोलशेत परिसरातील घरांमध्ये वारंवार अत्याचार केल्याचा आरोप आहे. आरोपींनी या प्रकाराची माहिती कोणाला दिल्यास जीवे मारण्याची धमकी दिल्याने तरुणी घाबरली होती. त्यामुळे ती अनेक महिने हा प्रकार सहन करत गप्प राहिली. मात्र, आरोपींचा त्रास वाढत गेल्यानंतर तिने धाडस करून आईला संपूर्ण प्रकार सांगितला. मुलीने सांगितलेला प्रकार समजल्यानंतर कुटुंबीयांनी तत्काळ पोलिसांकडे धाव घेत तक्रार दाखल केली.
सुरुवातीला कोपरी पोलिसांनी या प्रकरणी बलात्काराचा गुन्हा दाखल करून तपास सुरू केला. तपासादरम्यान अत्याचाराच्या घटना कापूरबावडी पोलीस ठाण्याच्या हद्दीत घडल्याचे स्पष्ट झाल्यानंतर पुढील तपास कापूरबावडी पोलिसांकडे सोपविण्यात आला. कापूरबावडी पोलिसांनी कारवाई करत दोन आरोपींना अटक केली, तर या गुन्ह्यात सहभागी असलेल्या तिसऱ्या अल्पवयीन आरोपीला ताब्यात घेतले. अटकेत असलेल्या दोन्ही आरोपींना न्यायालयात हजर केले असता, न्यायालयाने त्यांना पाच दिवसांची पोलीस कोठडी सुनावली. तर अल्पवयीन आरोपीला भिवंडी येथील बाल न्यायालयासमोर हजर करण्यात आले आहे. या प्रकरणाचा पुढील तपास कापूरबावडी पोलीस करीत असून, तक्रारीतील आरोप आणि प्रत्येक आरोपीची भूमिका याबाबत चौकशी सुरू आहे.
.png "Videos"){kind=small}
