कराड : सोमवार पेठ येथील व्यावसायिकास बांधकाम परवाना देण्यासाठी दहा लाखांची मागणी केल्याचा प्रकार उघडकीस आला आहे. पाच लाखांचा पहिला हप्ता स्वीकारताना कराड नगरपालिकेचे तत्कालीन मुख्याधिकारी शंकर खंदारे यांच्यासह नगररचना विभागाचे सहाय्यक नगररचनाकार व बांधकाम विभागाच्या कनिष्ठ लिपीकावर लाचलुचपत प्रतिबंधक विभाग सातारच्या पथकाने सोमवारी रात्री कारवाई केली आहे.
कराड नगरपालिकेचे तत्कालीन मुख्याधिकारी शंकर खंदारे, नगररचना विभागातील सहाय्यक नगररचनाकार स्वानंद दिलीप शिरगुप्पे (सध्या रा. कराड, मूळ रा. कोडोली, ता. पन्हाळा, जि. कोल्हापूर), बांधकाम विभागातील कनिष्ठ लिपिक तौफीक कय्यूम शेख (वय ४०, रा. कार्वे नाका, कराड) यांच्यासह अजिंक्य अनिल देव अशी गुन्हा नोंद झालेल्यांची नावे आहेत.
मिळालेल्या माहितीनुसार, तक्रारदार हे बांधकाम व्यावसायिक असून, त्यांचे कराड शहरातील सोमवार पेठ येथे पार्किंग व पाच मजली इमारतीचे काम प्रास्ताविक आहे. तक्रारदार यांनी इमारत बांधकाम परवानगी मिळण्याबाबत २०१७ मध्ये नगरपरिषद येथे प्रकरण दिले होते. त्याची मुदतवाढ २०१९ पर्यंत घेण्यात आली होती. सदरचे काम सुरू न झाल्याचे पुन्हा २०२१ मध्ये सुधारीत परवानगी मिळाली. परंतु, दरम्यानच्या काळात नियमावलीत बदल झाल्याने सुधारीत बांधकाम परवाना मिळण्याबाबत पुन्हा २०२३ मध्ये अर्ज दाखल केला होता. या कामाच्या परवानगी करीता तक्रारदार यांनी सहाय्यक नगररचनाकार स्वानंद शिरगुप्पे यांच्याकडे पाठपुरावा केला होता. त्यांनी खासगी व्यक्ती अजिंक्य देव याच्या समवेत तक्रारदार यांना भेटून १० लाखांच्या लाचेची मागणी केली होती.
पदाचा गैरवापर करत केली लाचेची मागणी
शिरगुप्पे याने अजिंक्य देव याच्या मदतीने तक्रारदार यांच्याकडे लाचेची मागणी करून प्रोत्साहन दिले. तसेच तौसिफ शेख याने शिरगुप्पे याच्या सांगण्यावरून मुख्याधिकारी कार्यमुक्त झाल्यानंतर देखील त्यांच्या नावाचे स्वाक्षरी करत चलन तयार केले. पाठीमागील तारखेचे जावक करून अजिंक्य देव याच्या सांगण्यावरून पहिला हप्ता म्हणून पाच लाखांची रक्कम स्वीकारली. चौघांनी तक्रारदार यांना त्यांच्या प्रलंबित कामाकरीता आपल्या पदाचा गैरवापर करीत लाच मागणी करून, प्रोत्साहन दिल्याबद्दल लाचलुचपत प्रतिबंधक विभाग सातारा यांनी ही कारवाई केली. याप्रकरणी कराड शहर पोलिसात गुन्हा नोंद केला आहे.
.png "Videos"){kind=small}
