पदवी नाही, प्रशिक्षण नाही; तरीही रुग्णांवर उपचार! फुरसुंगीत बोगस डॉक्टरविरुद्ध गुन्हा दाखल
पुणे : पुण्यातून एक मोठी बातमी समोर आली आहे. कोणतीही मान्यताप्राप्त वैद्यकीय पदवी नसताना तसेच रुग्णांवर उपचार करण्यासाठी आवश्यक प्रशिक्षण घेतलेले नसतानाही डॉक्टर असल्याचे भासवून उपचार करणाऱ्या व्यक्तीविरुद्ध फुरसुंगी पोलिसांनी गुन्हा दाखल केला आहे. भेकराईनगर परिसरात हा प्रकार समोर आला आहे. शहजाद इक्बाल मोहम्मद खान ऊर्फ राज पटेल (रा. खटीक मोहल्ला, सांगोद, कोटा, राजस्थान) असे गुन्हा दाखल झालेल्या व्यक्तीचे नाव आहे. याप्रकरणी डॉ. राजेश महादेव पाखरे (वय ४९, रा. मांजरी, पुणे-सोलापूर महामार्ग) यांनी फुरसुंगी पोलिसांकडे तक्रार दिली आहे.
पोलिसांनी दिलेल्या माहितीनुसार, राज पटेल याच्याकडे रुग्णांवर उपचार करण्यासाठी आवश्यक असलेली मान्यताप्राप्त वैद्यकीय पदवी किंवा प्रशिक्षण नसल्याचा आरोप आहे. असे असतानाही तो भेकराईनगर येथील एस. पी. रेसिडेन्सी परिसरात ‘राज पटेल नेचरोपॅथी केअर’ या नावाने उपचार करत असल्याचे तक्रारीत नमूद करण्यात आले आहे.
वैद्यकीय क्षेत्रातील आवश्यक पात्रता नसलेल्या व्यक्तीकडून उपचार केले गेल्यास रुग्णांच्या आरोग्याला धोका निर्माण होण्याची शक्यता असते. आर्थिक फायद्यासाठी आरोपीकडून रुग्णांवर उपचार केले जात असल्याचाही आरोप तक्रारीत करण्यात आला आहे. या प्रकाराची माहिती मिळाल्यानंतर संबंधित विभागाकडून पडताळणी करण्यात आली. त्यानंतर फुरसुंगी पोलिसांकडे तक्रार दाखल करण्यात आली. पोलिसांनी संबंधित कायद्यांनुसार गुन्हा नोंदवून पुढील तपास सुरू केला आहे.
दरम्यान, आरोपीने आतापर्यंत किती रुग्णांवर उपचार केले, उपचारादरम्यान कोणती औषधे किंवा साहित्य वापरले, तसेच या माध्यमातून किती आर्थिक व्यवहार झाला, याची माहिती पोलिसांकडून घेतली जात आहे. आरोपीकडे वैद्यकीय उपचारांसाठी वापरले जाणारे साहित्य किंवा औषधांचा साठा होता का, याचाही तपास करण्यात येत आहे. या प्रकरणातील पुढील तपास फुरसुंगी पोलीस करीत आहेत.
.png "Videos"){kind=small}
