कात्रज बोगद्याजवळ दाम्पत्याला लुटणारे चोरटे अटकेत; पोलिसांची मोठी कारवाई
पुणे : राज्यासह देशभरात लुटमारीच्या घटना वाढल्या असून, वाढत्या घटनांमुळे नागरिकांमध्ये दहशत निर्माण होत आहे. अशातच आता दुचाकीस्वार दाम्पत्याला धमकावून त्यांना लुटल्याची घटना कात्रज घाटात घडली आहे. पसार झालेल्या तीन चोरट्यांना पोलिसांनी अटक केली आहे. याप्रकरणी तौहिद असला शाह (वय २३), सुलेमान यासीन शेख (वय २१), रोहित बबलू सिंग (वय २०, तिघे रा. पिंपरी) यांना अटक करण्यात आली. याबाबत एकाने आंबेगाव पोलिसांत तक्रार दिली आहे.
पोलिसांच्या माहितीनुसार, तक्रारदार हे खेड शिवापूर येथे राहायला आहेत. अंगारकी चतुर्थी असल्याने तक्रारदार व त्यांची पत्नी मंगळवारी (२९ सप्टेंबर) दुचाकीवरून पहाटे साडेचारच्या सुमारास श्रीमंत दगडूशेठ हलवाई गणपती मंदिरात दर्शनासाठी निघाले होते. कात्रज घाटातून ते दुचाकीवरून पुण्याकडे येत होते. जुन्या कात्रज बोगद्याजवळ दुचाकीवरून आलेल्या चोरट्यांनी दुचाकीस्वार तक्रारदार आणि त्यांच्या पत्नीला अडवले. चोरट्यांनी त्यांना धमकावले.
दुचाकीची चावी चोरट्यांनी ताब्यात घेतली. नंतर चोरट्यांनी तक्रारदाराच्या पत्नीच्या गळ्यातील एक लाख रुपयांचे मंगळसूत्र हिसकावून नेले. घाबरलेल्या दाम्पत्याने आंबेगाव पोलीस ठाण्यात धाव घेऊन तक्रार दिली. पोलिसांनी घटनास्थळी धाव घेऊन तातडीने तपास सुरू केला. पसार झालेल्या तीन चोरट्यांना पोलिसांनी ताब्यात घेतले. पोलीस उपनिरीक्षक युवराज शिंदे तपास करत आहेत.
पीएमपी प्रवासी महिलेचे दागिने चोरीला
पीएमपी प्रवासी महिलेचे दागिने चोरट्यांनी लांबविल्याची घटना डेक्कन जिमखाना भागात घडली आहे. या प्रकरणी चोरट्यांविरुद्ध डेक्कन पोलिसांनी गु्न्हा दाखल केला. पोलिसांनी दिलेल्या माहितीनुसार, तक्रारदार या शिक्षिका आहेत. २८ सप्टेंबर रोजी त्या सकाळी पावणेदहाच्या सुमारास पुणे-मुंबई रस्त्यावरील वाकडेवाडी स्थानक परिसरातून पीएमपी बसने टिळक रस्त्याकडे निघाल्या. बसमध्ये गर्दी होती. चोरट्यांनी त्यांच्या पिशवीतून मंगळसूत्र, मोबाइल संच, रोकड असा ४८ हजार रुपयांचा ऐवज लांबविला. पोलीस उपनिरीक्षक शेंडे तपास करत आहेत.
.png "Videos"){kind=small}
