वडगाव मावळात प्रतिबंधित अन्नपदार्थांचा ७.९७ लाखांचा साठा जप्त, दोघांना अटक; अन्न व औषध प्रशासनाची मध्यरात्री धडक कारवाई

वडगाव मावळ परिसरात प्रतिबंधित अन्नपदार्थांची विक्री करण्याच्या उद्देशाने साठवणूक केल्याप्रकरणी अन्न व औषध प्रशासनाने धडक कारवाई केली आहे. या प्रकरणी तिघांविरुद्ध गुन्हा दाखल करण्यात आला आहे.

वडगाव मावळ/सतिश गाडे : वडगाव मावळ परिसरात प्रतिबंधित अन्नपदार्थांची विक्री करण्याच्या उद्देशाने साठवणूक केल्याप्रकरणी अन्न व औषध प्रशासनाने धडक कारवाई केली आहे. १९ ऑगस्ट रोजी रात्री ८.३० ते २० ऑगस्ट रोजी पहाटे ३.१५ वाजेपर्यंत करण्यात आलेल्या या कारवाईत दोन ठिकाणांहून तब्बल ७ लाख ९७ हजार ७३० रुपये किमतीचा प्रतिबंधित अन्नपदार्थांचा साठा जप्त करण्यात आला आहे. या प्रकरणी तिघांविरुद्ध गुन्हा दाखल करण्यात आला असून, दोन आरोपींना अटक करण्यात आली आहे.

अन्न सुरक्षा अधिकारी अनिकेत भगवानराव भिसे यांच्या फिर्यादीवरून गुन्हा दाखल करण्यात आला आहे. आरोपींमध्ये शुभम ज्ञानेश्वर म्हाळसकर (वय २५, रा. म्हाळसकर वस्ती, वडगाव मावळ), गणेश नारायण जगनाडे (वय ४१, रा. बदालवाडी, नवलाख उंबरे) आणि राजू उर्फ राजवीर चौधरी (वय अंदाजे ३८, रा. डी.वाय. पाटील कॉलेजजवळ, आंबी) यांचा समावेश आहे.

म्हाळसकर वस्ती येथील आरोपी क्रमांक एकच्या पडक्या खोलीत तसेच बदालवाडी, नवलाख उंबरे येथील आरोपी क्रमांक दोनच्या १० बाय १२ फूट आकाराच्या पत्र्याच्या शेडमध्ये प्रतिबंधित अन्नपदार्थांचा साठा आढळून आला. आरोपी क्रमांक एकच्या ताब्यातून २ लाख ६७ हजार २१० रुपये, तर आरोपी क्रमांक दोनच्या ताब्यातून ५ लाख ३० हजार ५२० रुपये किमतीचा माल जप्त करण्यात आला आहे. सदर प्रतिबंधित अन्नपदार्थ आरोग्यास हानिकारक असल्याचे फिर्यादीत नमूद करण्यात आले असून, त्यांच्या सेवनामुळे नागरिकांच्या आरोग्यावर विपरीत परिणाम होण्याची शक्यता व्यक्त करण्यात आली आहे. विक्रीच्या उद्देशाने या पदार्थांची साठवणूक केल्याचा आरोप आरोपींवर आहे.

या प्रकरणात अन्न सुरक्षा व मानके कायदा २००६ मधील संबंधित कलमांसह भारतीय न्याय संहितेतील कलमांनुसार गुन्हा दाखल करण्यात आला आहे. तसेच जप्त मालाचा उत्पादक, संबंधित कंपनीचे भागीदार, नॉमिनी आणि पुरवठादारांपर्यंत सखोल तपास करण्याची आवश्यकता असल्याचे फिर्यादीत नमूद आहे. आरोपी शुभम म्हाळसकर व गणेश जगनाडे यांना २० ऑगस्ट रोजी सकाळी ६.२८ वाजता अटक करण्यात आली. या कारवाईची स्टे.डा. नोंद क्रमांक ०५/२०२६ अशी आहे. गुन्ह्याचा पुढील तपास पोलीस उपनिरीक्षक जाधवराव करीत असून, गुन्हा पोलीस हवालदार गायकवाड (ब.नं. ८२१) यांनी दाखल केला आहे. जप्त करण्यात आलेला माल नेमका कुठून आला, त्याचा पुरवठा कोण करीत होते आणि या प्रकरणामागे आणखी कोणाचा सहभाग आहे का, याचा तपास सुरू आहे.

हे सुद्धा वाचा : दिंडोरीत खळबळ! पैशांच्या वादातून तरुणाची निघृण हत्या; पोलिसांनी आरोपींना ठोकल्या बेड्या

प्रतिबंधित अन्नपदार्थांच्या विक्रीवर प्रशासनाची नजर

दरम्यान, या कारवाईमुळे वडगाव मावळ व परिसरात प्रतिबंधित अन्नपदार्थांची साठवणूक व विक्री करणाऱ्यांवर अन्न व औषध प्रशासनाची नजर असल्याचे स्पष्ट झाले आहे. नागरिकांच्या आरोग्याशी संबंधित बाब असल्याने अशा पदार्थांची बेकायदेशीर विक्री किंवा साठवणूक आढळल्यास प्रशासनाकडून कठोर कारवाई होण्याची शक्यता आहे.