अहिल्यानगरमधील खून प्रकरणात मोठी अपडेट! २४ तासांत दोघे आरोपी पोलिसांच्या जाळ्यात

बालिकाश्रम रोडवरील न्यु आर्ट्स कॉलेजच्या मागील गेटसमोर एका ५५ वर्षीय इसमावर धारदार हत्याराने वार करून खून केल्याची धक्कादायक घटना घडली होती. याप्रकरणातील आरोपींना पोलिसांनी अटक केली आहे.

• अहिल्यानगरमधील खून प्रकरणात मोठी अपडेट!
• २४ तासांत दोघे आरोपी पोलिसांच्या जाळ्यात
• पोलिसांच्या कामगिरीचे कौतुक

अहिल्यानगर : बालिकाश्रम रोडवरील न्यु आर्ट्स कॉलेजच्या मागील गेटसमोर एका ५५ वर्षीय इसमावर धारदार हत्याराने वार करून खून केल्याची धक्कादायक घटना घडली होती. याप्रकरणी तोफखाना पोलिसांनी अवघ्या २४ तासांत तपासाची चक्रे वेगाने फिरवत सुरज रवी सोनवणे आणि प्रेम उर्फ सोनुल्या रवी सोनवणे या दोन्ही मुख्य आरोपींना बेड्या ठोकल्या आहेत. हा खून नेमका कशामुळे व कसा घडला याबाबत पोलिस कसून चौकशी करत आहेत. अल्पावधीतच आरोपींना अटक केल्याबद्दल तोफखाना पोलिसांच्या कामगिरीचे सर्वत्र कौतुक होत आहे.

 

मिळालेल्या माहितीनुसार मंधन रवींद्र चव्हाण यांचे वडील रवींद्र रामभाऊ चव्हाण (वय ५५, रा. भिंगारदिवे मळा, सावेडी) हे ७ ऑक्टोबरला सायंकाळी साडेचार वाजण्याच्या सुमारास बालीकाश्रम रोडवरील एशियन फूड कोर्ट हॉटेलसमोरून जात होते. यावेळी आरोपींच्या मोटारसायकलला चव्हाण यांच्या मोटारसायकलचा कट लागल्याने एका आरोपीची चप्पल तुटली होती. याच किरकोळ कारणावरून आरोपींचा राग अनावर झाला. याच रागातून आरोपी सुरज रवी सोनवणे, प्रेम उर्फ सोनुल्या सोनवणे आणि त्यांच्या इतर साथीदारांनी संगनमत करून रवींद्र चव्हाण यांच्या पाठीवर आणि हातावर धारदार हत्याराने वार केले. या हल्ल्यात गंभीर जखमी झाल्यामुळे उपचारादरम्यान रवींद्र चव्हाण यांचा मृत्यू झाला. या प्रकरणी तोफखाना पोलिस ठाण्यात खुनाचा गुन्हा दाखल करण्यात आला होता. घटनेची गांभीर्य लक्षात घेऊन पोलिस अधीक्षक मुम्मका सुदर्शन, अप्पर पोलीस अधीक्षक वैभव कलुबर्मे आणि नगर शहर उपविभागीय पोलिस अधिकारी दिलीप टिपरसे यांनी तातडीने घटनास्थळाला भेट देऊन पाहणी केली.

पोलिसांच्या कामगिरीचे कौतुक

तोफखाना पोलिस ठाण्याचे पोलिस निरीक्षक बालाजी वैद्य यांच्या मार्गदर्शनाखाली पोलिसांनी तांत्रिक तपासाच्या आधारे अवघ्या २४ तासांच्या आत दोन्ही आरोपींना जेरबंद केले आहे. आरोपींना तोफखाना पोलिस ठाण्यात आणण्यात आले असून, हा खून नेमका कशामुळे व कसा घडला याबाबत पोलिस कसून चौकशी करत आहेत. अल्पावधीतच आरोपींना अटक केल्याबद्दल तोफखाना पोलिसांच्या कामगिरीचे सर्वत्र कौतुक होत आहे.

हे सुद्धा वाचा : येवलेवाडीत जुन्या वादातून तरुणावर जीवघेणा हल्ला, मारहाणीनंतर धमकी; नेमकं काय घडलं?

आरोपी पकडल्याने समाधान 

बुधवारी दुपारनंतर घडलेल्या या घनटेत बळी गेलेले आमदार संग्राम जगताप यांच्या समर्थकाचे वडील होते. त्यामुळे नेमकी घटना काय आहे, यामागे नेमके कारण काय आहे, याची उत्सुकता नगरकरांना होती. केवळ गाडीचा कट लागल्याने खून होऊ शकतो, यावरही आश्चर्य व्यक्त होत होते. मृताच्या नातेवाईकांनीही आंदोलनाचा इशारा दिला होता. आमदार जगताप यांनीही याप्रकरणात लक्ष घातले होते. या पार्श्वभूमीवर आरोपींना २४ तासांत जेरबंद केल्याने समाधान व्यक्त होत आहे.