Ahilyanagar : जमीन व्यवहारात डॉक्टरची फसवणूक; माजी नगरसेवकासह चौघांवर मोक्का कारवाई

तब्बल १४ कोटी ६६ लाख ५१ हजार रुपयांची फसवणूक केल्याप्रकरणी पोलिस प्रशासनाने कठोर पाऊल उचलले आहे. यातील मुख्य सूत्रधार व भाजपच्या माजी नगरसेवकासह चौघांच्या टोळीविरुद्ध महाराष्ट्र संघटित गुन्हेगारी नियंत्रण कायद्यानुसार (मोक्का) धडक कारवाई केली आहे.

अहिल्यानगर : सावेडी येथील एका नामांकित डॉक्टरांना जमीन खरेदी-विक्रीच्या विविध व्यवहारांत जाळ्यात ओढून बनावट कागदपत्रे, खोटे मालक आणि बोगस सह्यांच्या आधारे तब्बल १४ कोटी ६६ लाख ५१ हजार रुपयांची फसवणूक केल्याप्रकरणी पोलिस प्रशासनाने कठोर पाऊल उचलले आहे. यातील मुख्य सूत्रधार व भाजपच्या माजी नगरसेवकासह चौघांच्या टोळीविरुद्ध महाराष्ट्र संघटित गुन्हेगारी नियंत्रण कायद्यानुसार (मोक्का) धडक कारवाई केली आहे.

नाशिक परिक्षेत्राच्या पोलिस महानिरीक्षकांनी या प्रस्तावाला नुकतीच मंजुरी दिल्याने भू-माफियांचे धाबे दणाणले आहेत. माजी नगरसेवक स्वप्निल रोहिदास शिंदे (रा. सावेडी, अहिल्यानगर), अमोल बबन जाधव (रा. मोरगव्हाण, ता. नेवासे), महेश नारायण कुहे आणि भारत फुलमाळी (रा. घोडेगाव, ता. नेवासे) अशी मोक्कांतर्गत कारवाई झालेल्या आरोपींची नावे आहेत. झोपडी कॅन्टीन परिसरातील डॉ. अनिल सूर्यभान आठरे यांच्या तक्रारीवरून एमआयडीसी पोलिस ठाण्यात ८ नोव्हेंबर २०२५ रोजी हा गुन्हा नोंदवण्यात आला होता. आरोपींनी सुरुवातीला डॉक्टरांचा विश्वास संपादन केला. त्यानंतर त्यांना जमिनी दाखवून व्यवहाराचे आमिष दाखवले. प्रत्यक्ष व्यवहाराच्या वेळी जमिनीचे बनावट मालक उभे करून त्यांच्या बनावट सह्या आणि बोगस दस्तऐवज तयार करण्यात आले. या कागदपत्रांच्या आधारे वेळोवेळी कोट्यवधी रुपये उकळत आरोपींनी ही फसवणूक केली.

गुन्ह्याचे गांभीर्य ओळखून तपास आर्थिक गुन्हे शाखेकडे सोपवण्यात आला होता. आर्थिक गुन्हे शाखेचे पोलिस निरीक्षक डॉ. शरद गोर्डे यांनी तपासाची चक्रे जलद गतीने फिरवत मुख्य संशयित अमोल जाधवला बेड्या ठोकल्या. त्यानंतर माजी नगरसेवक स्वप्निल शिंदे व महेश कुन्हे यांना नाशिक कारागृहातून ताब्यात घेऊन या प्रकरणात वर्ग करत अटक केली.

आरोपींनी पूर्वसंजोगाने आणि संघटितरीत्या हा आर्थिक गुन्हा केल्याचे निष्पन्न झाल्यानंतर पोलिसांनी मोक्काचा प्रस्ताव तयार केला. पोलिस अधीक्षक मुम्मका सुदर्शन यांच्यामार्फत पाठवलेल्या या प्रस्तावाची छाननी करून नाशिक परिक्षेत्राच्या पोलिस महानिरीक्षकांनी त्यास मंजुरी दिली. सध्या शहर उपअधीक्षक डॉ. दिलीप टिपरसे या गुन्ह्याचा पुढील तपास करत आहेत.

‘मोक्का’ची डबल कारवाई

यापूर्वी स्वप्नील शिंदे याच्या टोळीवर खूनाच्या गुन्ह्यात मोक्कानुसार कारवाई करण्यात आलेली आहे. आता जमीन फसवणुकीच्या या कोट्यवधींच्या प्रकरणात पुन्हा ‘मोक्का’ लागल्यामुळे त्याच्या अडचणीत मोठी वाढ झाली आहे. अहिल्यानगरमध्ये तरी बहुदा एखाद्या टोळीवर असा डबल मोक्का लागण्याची ही पहिलीच वेळ असावी. त्यामुळे जिल्ह्यातील गुन्हेगारांचे धाबे दणाणलेत.

विविध पोलिस ठाण्यांत गुन्हे

स्वप्नील शिंदे आणि त्याच्या साथीदारांवर यापूर्वीही मारामारी, दहशत पसरवणे, बेकायदेशीर जमाव जमवणे यांसारखे विविध गंभीर गुन्हे तोफखाना आणि इतर पोलीस ठाण्यांमध्ये दाखल आहेत.

हे सुद्धा वाचा : पुण्यात भरधाव कारच्या धडकेत सॉफ्टवेअर इंजिनिअरचा मृत्यू; पाषाण-बावधन रस्त्यावरील धक्कादायक घटना

स्वप्नील रोहिदास शिंदेची गुन्हेगारी पार्श्वभूमी

जुलै २०२३ मध्ये सावेडी येथील राष्ट्रवादी काँग्रेसचे कार्यकर्ते अंकुश दत्तात्रय चत्तर यांच्यावर लोखंडी रॉड आणि शस्त्रांनी प्राणघातक हल्ला झाला होता, ज्यामध्ये त्यांचा मृत्यू झाला. या हत्या प्रकरणात स्वप्नील शिंदे याला मुख्य म्हणून अटक करण्यात आली. या हत्येच्या गुन्ह्यानंतर स्थानिक गुन्हे शाखा आणि पोलिसांनी स्वप्नील शिंदे आणि त्याच्या टोळीवर संघटित गुन्हेगारी प्रतिबंधक कायद्यानुसार ‘मोक्का’ कारवाई केली.