नराधम दत्तात्रय गाडेबाबत पुणे पोलीसांचा मोठा निर्णय; आता छेडछाडीला...
पुणे : स्वारगेट बसस्थानकातील अत्याचारप्रकरणातला नराधम दत्तात्रय गाडेने महिला छेडछाड तसेच अशा प्रकारचे आणखी काही गुन्हे केल्याची दाट शक्यता पोलिसांना आहे. त्याच्या छेडछाडीला कोणी बळी पडले असल्यास त्याबाबत गुन्हे शाखेकडे तक्रार करावी, असे आवाहन पुणे पोलिसांच्या वतीने करण्यात आले आहे. दरम्यान, याप्रकरणाचा तपास पोलीस आयुक्त अमितेश कुमार यांनी गुन्हे शाखेकडे सोपविला आहे.
स्वारगेट स्थानकात २५ फेब्रुवारी रोजी पहाटे सहाच्या सुमारास पिडीत तरुणीला ताई म्हणून तसेच वाहक असल्याची बतावणी करून एका उभा असलेल्या शिवशाहीत नेहून अत्याचार केल्याची घटना घडली. जीवे मारण्याची धमकी देऊन दोनदा अत्याचार केला. घटनेनंतर राज्यभरात खळबळ उडाली होती. तीन दिवसांच्या अथक प्रयत्नानंतर पोलिसांनी या नराधम दत्तात्रय गाडेला गुनाट या त्याच्याच गावातील शेतातून पकडले.
गाडेवर यापूर्वी महिलांना लुटल्याचे ५ गुन्हे पुणे ग्रामीण आणि अहिल्यानगर येथे दाखल आहेत. तो काही वर्ष मोटारचालक म्हणून काम करत होता. महिलांना गावी सोडण्याच्या बतावणीने तो त्यांना निर्जन ठिकाणी नेहून लुटत होता. त्यामुळे त्याची गुन्हेगारी पाश्वभूमी विचारात घेऊन पोलिसांकडून तपास करण्यात येत आहे.
‘गाडेवर यापूर्वी जबरी चोरीचे गुन्हे दाखल आहेत. स्वारगेट अत्याचार प्रकरणाचा सखोल तपास सुरू असून, त्याने अशा प्रकारचे आणखी काही गुन्हे केल्याचा संशय आहे. त्यादृष्टीने तपास करण्यात येत आहे, असे गुन्हे शाखेतील वरिष्ठ अधिकाऱ्यांनी सांगितले. त्याच्याविरुद्ध तक्रार असल्यास त्वरीत पुणे पोलिसांच्या गुन्हे शाखेत तक्रार द्यावी,’ असे आवाहन देखील करण्यात आले आहे.
.png "Videos"){kind=small}
