कॉलेजच्या फ्रेशर पार्टीवरून वाद; एका विद्यार्थ्यावर कोयत्याने सपासप वार
पिंपरी : राज्यात गुन्हेगारी मोठ्या प्रमाणात वाढली आहे. खून, मारामाऱ्या, लुटमार, दरोडे यासारख्या घटना दररोज वेगवेळ्या भागात घडत असतात. गुन्हेगारी रोखण्यासाठी पोलिसांकडूनही प्रयत्न केले जात आहेत. मात्र प्रत्येक घटना रोखण्यात पोलिसांनाही यश मिळत नसल्याचे दिसून येत आहे. अशातच आता पुणे जिल्ह्यातून एक मोठी बातमी समोर आली आहे. संत तुकाराम नगर येथील डी. वाय. पाटील सिनियर कॉलेज येथे कॉलेजच्या फ्रेशर पार्टीवरून झालेल्या वादामुळे एका विद्यार्थ्यावर कोयत्याने हल्ला केला आहे. ही घटना सोमवारी (२८ जुलै) सकाळी ११:३० वाजता घडली आहे.
तन्मय अविनाश कांबळे (वय१८, कासारवाडी) याने संत तुकारामनगर पोलीस ठाण्यात फिर्याद दिली आहे. अभिषेक गिरी, अल्फान निसार पठाण, शिवराज तलवारे, सोहल शेख, बिराज विश्वकर्मा, यश दीपक पवार, आदिनाथ सोमनाथ गायकवाड आणि इतर अनोळखी व्यक्तींविरोधात गुन्हा दाखल केला आहे. आरोपींपैकी अभिषेक गिरी, अल्फान निसार पठाण, शिवराज तलवारे, सोहेल शेख, यश दीपक पवार, आदिनाथ सोमनाथ गायकवाड यांना अटक केली आहे.
पोलिसांनी दिलेल्या माहितीनुसार, फिर्यादी आणि त्यांचा मित्र अनिश पिंगळे नेहमीप्रमाणे कॉलेजमध्ये गेले असता, अभिषेक गिरी आणि अल्फान निसार पठाण यांनी अनिशसोबत फ्रेशर पार्टीला जाण्यावरून वाद घातला आणि त्याला शिवीगाळ केली. सकाळी साडेअकरा वाजता कॉलेज सुटल्यानंतर डी. वाय. पाटील सिनियर कॉलेजच्या गेटवर त्यांच्या ओळखीचे यश दीपक पवार, आदिनाथ सोमनाथ गायकवाड, सोहेल मुनीर सोहेल शेख, शिवराज तलवारे, निहाल, बिराज विश्वकर्मा आणि इतर मुलांनी फिर्यादीला बोलावून घेतले. त्यापैकी निहाल याने फिर्यादीच्या अंगावर त्याच्या ताब्यातील काळ्या रंगाची ॲक्टिवा मोटारसायकल घातली. सोहेल मुनीर याने फिर्यादीला जीवे मारण्याच्या उद्देशाने त्याच्या हातात असलेला लोखंडी कोयता फिर्यादीच्या डोक्यात आणि डाव्या हाताला मारून त्याला गंभीर जखमी केले.
तसेच फिर्यादीच्या जुन्या घराशेजारी राहणारा शिवराज तलवारे यानेही त्याच्या ताब्यातील मोटारसायकल फिर्यादीच्या अंगावर घातली. त्याने जीवे मारण्याच्या उद्देशाने त्याच्या हातात असलेला लोखंडी कोयता फिर्यादीच्या पाठीवर मारून त्याला गंभीर जखमी केले. त्यानंतर “आम्ही डी. वाय. पाटीलचे भाई आहोत” असे ओरडत, हातात असलेले कोयते हवेत फिरवत दहशत निर्माण केली आणि तेथून निघून गेले. संत तुकारामनगर पोलीस अधिक तपास करत आहेत.
हे सुद्धा वाचा : पुण्यात चोरट्यांचा सुळसुळाट; ‘या’ भागात घरे फोडून लाखो रुपयांवर मारला डल्ला
.png "Videos"){kind=small}
