Pune Fraud : अटकेची भीती दाखवून ज्येष्ठ नागरिकाची फसवणूक; लाखो रुपयांना गंडवले

सायबर चोरट्यांनी एका ज्येष्ठ नागरिकाची १९ लाख ८० हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर चोरट्यांविरुद्ध गु्न्हा दाखल करण्यात आला आहे.

• राज्यासह देशभरात फसवणुकीच्या घटना वाढल्या
• अटकेची भीती दाखवून ज्येष्ठ नागरिकाची फसवणूक
• तब्बल २० लाख रुपयांना घातला गंडा

पुणे : ‘काळ्या पैसे व्यवहारात तुमच्या बँक खात्याचा वापर झाला असून, या प्रकरणात अटक करण्यात येणार आहे’, अशी भीती दाखवून सायबर चोरट्यांनी एका ज्येष्ठ नागरिकाची १९ लाख ८० हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर चोरट्यांविरुद्ध गु्न्हा दाखल करण्यात आला आहे. याबाबत एका ८८ वर्षीय ज्येष्ठ नागरिकाने डेक्कन पोलिस ठाण्यात तक्रार दिली आहे.

तक्रारदार ज्येष्ठ नागरिक हे डेक्कन जिमखाना भागात राहतात. ९ जुलै रोजी सायबर चोरट्यांनी त्यांच्या मोबाइलवर संपर्क साधला. ‘नरेश गोयल नावाच्या एका व्यक्तीने ५३८ कोटी रूपयांचा गैरव्यवहार केला आहे. त्याने तुमचे आधारकार्ड आणि पॅनकार्ड वापरले आहे. आम्हाला तुमच्या बँकखात्याची तपासणी करायची आहे. याप्रकरणात पोलिसांकडून तुम्हाला अटक होऊ शकेल’, अशी भीती दाखवून सायबर चोरट्यांनी त्यांना बँक खात्यात पैसे जमा करण्यास सांगितले. त्यानंतर तक्रारदार ज्येष्ठ नागरिकाने चोरट्यांच्या बँक खात्यात वेळोवेळी १९ लाख ८० हजार रुपये जमा केले.

सायबर चोरट्यांनी त्यांच्याकडे पुन्हा पैशांची मागणी केली. संशय आल्याने त्यांनी चौकशी केली. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. गुन्हे शाखेचे पोलीस निरीक्षक प्रसाद राऊत तपास करत आहेत.

हे सुद्धा वाचा : एटीएम कार्डची अदलाबदल करून फसवणूक; तब्बल ‘इतक्या’ लाखांना घातला गंडा

गुंतवणुकीच्या आमिषाने दहा लाखांची फसवणूक

शेअर बाजारात गुंतवणुकीच्या आमिषाने सायबर चोरट्यांनी तरुणाची नऊ लाख ७१ हजार रुपयांची फसवणूक केली आहे. याबाबत ३४ वर्षीय तरुणाने विमानतळ पोलिस ठाण्यात तक्रार दिली आहे. त्यानुसार, सायबर चोरट्यांविरुद्ध गुन्हा दाखल करण्यात आला. तक्रारदार तरुण लोहगाव भागात राहतो. चोरट्यांनी तरुणाला मोबाइलद्वारे संपर्क साधला. शेअर बाजारात गुंतणूक केल्यास चांगला परतावा मिळेल, असे आमिष दाखविले. सुरुवातीला तरुणाने थोडी रक्कम चोरट्याच्या खात्यात जमा केली. या रक्कमेवर परताव मिळाल्याचे भासविले. प्रत्यक्षात चोरट्यांनी त्याला परतावा दिला नाही. त्यानंतर तरुणाने आणखी रक्कम गुंतवली. तरुणाला परतावा, तसेच मूळ मुद्दल न दिल्याने त्याने नुकतीच तक्रार दिली. वरिष्ठ पोलीस निरीक्षक गोविंद जाधव तपास करत आहेत.