आधी प्रेमाच्या जाळ्यात ओढले; मग रिसॉर्टमध्ये लग्न केलं अन्…; लोणावळ्यातील धक्कादायक प्रकार

नेरळ येथील एका अभियांत्रिकी महाविद्यालयात लॅब असिस्टंट म्हणून कार्यरत असलेल्या ३८ वर्षीय व्यक्तीने त्याच महाविद्यालयातील १९ वर्षीय विद्यार्थिनीला प्रेमाच्या जाळ्यात अडकवून तिची फसवणूक केल्याचा प्रकार उघडकीस आला आहे.

लोणावळा/सतिश गाडे : मावळ तालुक्यातील लोणावळ्यातून एक धक्कादायक आणि संतापजनक घटना समोर आली आहे. नेरळ येथील एका अभियांत्रिकी महाविद्यालयात लॅब असिस्टंट म्हणून कार्यरत असलेल्या ३८ वर्षीय व्यक्तीने त्याच महाविद्यालयातील १९ वर्षीय विद्यार्थिनीला प्रेमाच्या जाळ्यात अडकवून तिची फसवणूक केल्याचा प्रकार उघडकीस आला आहे. लग्नाचे आमिष दाखवून संबंध प्रस्थापित केल्यानंतर तिच्यावर धर्मांतरासाठी दबाव टाकल्याप्रकरणी लोणावळा ग्रामीण पोलिसांत गुन्हा दाखल करण्यात आला आहे.

 

पोलिसांनी दिलेल्या माहितीनुसार, तौसीफ निसार ठाणगे (वय ३८) असे संशयिताचे नाव आहे. आरोपीने सोशल मीडियाच्या माध्यमातून विद्यार्थिनीशी ओळख वाढवून तिचा विश्वास संपादन केला. त्यानंतर तिला लोणावळ्यातील पवनानगर परिसरातील एका रिसॉर्टमध्ये नेऊन लग्नाचा बनाव रचला. मात्र, काही दिवसांतच आरोपीचे खरे रूप समोर आले. तो आधीच विवाहित असून त्याला चार मुले असल्याचे उघड झाले.

ही बाब समोर आल्यानंतर आरोपीने पीडितेचा मानसिक छळ सुरू केला. “जर तुला माझ्यासोबत राहायचे असेल, तर हिंदू धर्म सोडून मुस्लीम धर्म स्वीकारावा लागेल आणि बुरखा घालावा लागेल,” अशी सक्ती आरोपीने केल्याचा आरोप आहे. एवढ्यावरच न थांबता, पीडितेच्या शिक्षणासाठी मिळालेल्या ४२,००० रुपये शिष्यवृत्तीची रक्कमही आरोपीने हडप केल्याचे समोर आले आहे. आपली फसवणूक झाल्याचे लक्षात येताच पीडित विद्यार्थिनीने धाडस दाखवत पोलिसांत तक्रार दाखल केली आहे.

लोणावळा ग्रामीण पोलिसांनी आरोपीविरुद्ध फसवणूक, विश्वासघात तसेच जबरदस्तीने धर्मांतरासाठी दबाव टाकल्याप्रकरणी विविध कलमान्वये गुन्हा नोंदवला असून, पुढील तपास सुरू आहे. आरोपीचा शोध घेण्यासाठी पोलीस पथके रवाना करण्यात आली आहेत. या घटनेमुळे शैक्षणिक क्षेत्रात मोठी खळबळ उडाली असून, परिसरात संताप व्यक्त केला जात आहे.

हे सुद्धा वाचा : गॅस तुटवड्यामुळे छोटे व्यवसाय अडचणीत; आंतरराष्ट्रीय तणावाचा मावळ तालुक्याला फटका

नगरसेवकाच्या मुलाने अल्पवयीन मुलींवर केले अत्याचार

गोव्यातून एक संतापजनक आणि धक्कादायक घटना समोर आली आहे. एका दक्षिण गोव्यातील स्थानिक नगरसेवकाच्या २२ वर्षीय मुलाने तब्बल २५ ते ३० अल्पवयीन मुलींशी लैंगिक संबंध ठेवल्याचे समोर आले आहे. एवढेच नाही तर पीडित मुलींचे व्हिडीओ व्हायरल करण्याची धमकी देखील दिल्याचे समोर आले आहे. हे प्रकरण उघडकीस आल्यानंतर गोव्यामध्ये मोठी खळबळ उडाली आहे. या प्रकरणातील संशयित मुलाचे नाव सोहम नाईक असे आहे. पोलिसांनी त्याला रविवारी रात्री अटक केली आहे.