सिगारेट न दिल्याचा राग अनावर; हातगाडीवर काम करणाऱ्या तरुणाला बेदम मारहाण

हातगाडीवर काम करणाऱ्या १८ वर्षीय तरुणाला सिगारेट न दिल्याचा राग आल्याने दोघांनी काठीने व लाथाबुक्क्यांनी बेदम मारहाण केल्याची धक्कादायक घटना मोरवाडी चौक येथे घडली आहे.

• राज्यासह देशभरात गुन्हेगारीच्या घटना वाढल्या
• सिगारेट न दिल्याचा राग अनावर
• हातगाडीवर काम करणाऱ्या तरुणाला बेदम मारहाण

पिंपरी : राज्यासह देशभरातील वेगवेगळ्या भागातून खून, हाणामाऱ्या, धमक्या, लुटमार यासारख्या घटना उघडकीस येत असतात. वाढत्या गुन्हेगारीमुळे नागरिकांमध्ये भिती पसरत आहे. गुन्हेगारीला आळा घालण्याची नागरिकांची मागणी आहे. अशातच आता एक मोठी बातमी समोर आली आहे. हातगाडीवर काम करणाऱ्या १८ वर्षीय तरुणाला सिगारेट न दिल्याचा राग आल्याने दोघांनी काठीने व लाथाबुक्क्यांनी बेदम मारहाण केल्याची धक्कादायक घटना मोरवाडी चौक येथे घडली आहे. या प्रकरणी पोलिसांनी दोघांना अटक केली आहे.

कुंदन गायकवाड (२४, रा. अजमेरा म्हाडा, मोरवाडी) आणि अभिषेक दिलीप भोसले (२५, रा. लालटोपी नगर, मोरवाडी) अशी अटक करण्यात आलेल्या आरोपींची नावे आहेत. तर जखमी तरुणाचे नाव मोहमद जाफर अबरार शेख (१८, रा. म्हाडा के-बिल्डिंग, अजमेरा, पिंपरी) असे आहे. संत तुकारामनगर पोलिस ठाण्यात शनिवारी (दि. १) शेख यांनी या घटनेची फिर्याद दिली आहे.

पोलिसांनी दिलेल्या माहितीनुसार, फिर्यादी शेख हातगाडीवर काम करत असताना आरोपी त्याच्याकडे सिगारेट मागण्यासाठी आले. त्याने नकार दिल्यानंतर आरोपी संतापले. त्यांनी “मी इथला भाई आहे” असे म्हणत त्याच्यावर हल्ला केला. एकाने लाकडी काठीने छातीवर प्रहार केला, तर दुसऱ्याने लाथाबुक्क्यांनी मारहाण केली. या घटनेदरम्यान आरोपींनी सार्वजनिक ठिकाणी आरडाओरडा करून नागरिकांमध्ये दहशत निर्माण केली. संत तुकारामनगर पोलिसांनी गुन्हा नोंदवून पुढील तपास सुरू केला आहे.

18 वर्षीय मुलीवर चॉपरने हल्ला

पिंपरी शहरातील आयटी हब म्हणून ओळखल्या जाणाऱ्या हिंजवडी परिसरात शनिवारी दुपारी धक्कादायक घटना घडली आहे. प्रेमसंबंधातून एका १८ वर्षीय तरुणीवर चॉपरने वार करून तिला गंभीर जखमी करण्यात आले आहे. या प्रकरणी हिंजवडी पोलिसांनी तात्काळ कारवाई करत तीन जणांना ताब्यात घेतले असून, त्यात मुलीचा प्रियकरही आहे. ही घटना हिंजवडीतील साखरे वस्ती परिसरात सायंकाळी सव्वाचारच्या सुमारास घडली आहे. हल्ल्यात तरुणीच्या हाताला, तोंडाला आणि शरीराच्या इतर भागांवर जखमा झाल्या असून, तिला तात्काळ जवळच्या रुग्णालयात दाखल करण्यात आले आहे. डॉक्टरांनी तिची प्रकृती आता स्थिर असल्याचे सांगितले आहे. हिंजवडी पोलिसांनी तातडीने घटनास्थळी धाव घेत आरोपींना ताब्यात घेतले आहे. या प्रकरणाचा पुढील तपास सहाय्यक पोलिस आयुक्त कुऱ्हाडे यांच्या मार्गदर्शनाखाली पोलिस निरीक्षक बालाजी पांढरे करत आहेत. पोलिसांनी प्राथमिक तपासात हल्ल्याचे कारण ‘प्रेमसंबंधातून निर्माण झालेला वाद’ असल्याचे स्पष्ट केले आहे.