‘निवडणुकीत उभी कशाला राहिली? ताबडतोब माघार घे नाहीतर…’; महिला उमेदवाराला शिवीगाळ करत दिली गेली धमकी

'निवडणुकीत उभी कशाला? ताबडतोब माघार घे नाहीतर मारून टाकीन !' अशी धमकी आरोपीने दिल्याचे तक्रारीत नमूद आहे. तरुणीने प्रतिकार करून आरडाओरड सुरू केल्याने आरोपी पळून गेला.

अमरावती : नगरपरिषद निवडणुकीच्या तोंडावर चांदूर रेल्वे शहरात वातावरण चांगलेच तापले आहे. अशातच आम आदमी पक्षाच्या महिला उमेदवाराला घरात शिरून शिवीगाळ, छेडछाड आणि जीवघेण्याची धमकी देण्यात आली. ही धक्कादायक घटना गुरुवारी (दि.27) रात्री साडेआठच्या दरम्यान घडली.

चांदूर रेल्वे पोलिसांना तक्रार मिळताच रात्री पावणे बाराच्या सुमारास आरोपी रवी रामचंद्र कातोरे (रा. चांदूर रेल्वे) याच्याविरुद्ध गुन्हा दाखल करून अटक करण्यात आली. चांदूर रेल्वेतील ही घटना केवळ एक उमेदवारावरील हल्ला नसून निवडणूक प्रक्रियेवर दबाव आणण्याचा प्रयत्न आहे. पोलिसांनी तत्काळ कारवाई करून आरोपीला अटक केली असली तरी या घटनेमुळे निवडणुकीचे वातावरण तणावपूर्ण झाले आहे. तक्रारकर्ती तरुणी ही चांदूर रेल्वे नगरपरिषदेच्या सार्वत्रिक निवडणुकीत आम आदमी पक्षाकडून नगरसेवकपदासाठी उभी आहे.

विविध कलमांतर्गत गुन्हा दाखल

चांदूर रेल्वे पोलिसांनी आरोपी रवी कातोरे याच्याविरुद्ध विविध कलमांतर्गत गुन्हा दाखल केला आहे. पुढील तपास स्थानिक पोलिस करत आहेत. या घटनेनंतर चांदूर रेल्वे शहरात मोठी चर्चा सुरू आहे. तरुणीला घरात घुसून धमकावणे हा निंदनीय, भ्याड आणि राजकीय दडपशाहीचा प्रकार असल्याची तीव्र प्रतिक्रिया नागरिकांकडून उमटत आहे.

हेदेखील वाचा : ‘पंतप्रधान नरेंद्र मोदी, मुख्यमंत्री देवेंद्र फडणवीस यांच्या सक्षम नेतृत्त्वावर जनतेचा विश्वास’; शिवेंद्रसिंहराजेंचं विधान

विविध प्रकारे टाकला जात होता दबाव

गेल्या काही दिवसांपासून आरोपी तिच्यावर विविध प्रकारे दबाव टाकत असल्याची माहिती मिळते. गुरुवारी रात्री पक्षाची टांगा गल्ली येथील प्रचारसभा संपवून ती घरी परतली. त्यावेळी तिचे आई-वडील व बहीण हे एका कार्यक्रमासाठी बाहेर गेले होते. घर उघडून आत जाताच त्याक्षणी आरोपी मागून घरात शिरला आणि वाईट उद्देशाने तिचा हात पकडून शिवीगाळ करत धमक्या दिल्या. ‘निवडणुकीत उभी कशाला? ताबडतोब माघार घे नाहीतर मारून टाकीन !’ अशी धमकी आरोपीने दिल्याचे तक्रारीत नमूद आहे. तरुणीने प्रतिकार करून आरडाओरड सुरू केल्याने आरोपी पळून गेला.

हेदेखील वाचा : Raigad News: कर्जतमधील रखडलेली विकासकामं लोकप्रतिनिधींचं अपयश नाही का? उपमुख्यमंत्री अजित पवार यांचा सवाल