व्हायरल ऑडिओ क्लिपचं प्रकरण भोवलं, विजय चाैधरींंना अटक; 'या' तारखेपर्यंत पोलिस कोठडी
नंदुरबार : राज्याच्या राजकारणात खळबळ उडविणाऱ्या कथित ध्वनीफीत प्रकरणात भाजपचा माजी महामंत्री तथा उत्तर महाराष्ट्र समन्वयक विजय वसंत चौधरी याला स्थानिक गुन्हे शाखेचे पोलिस निरीक्षक हेमंत पाटील यांच्या पथकाने धुळे येथून ताब्यात घेऊन अटक केली आहे. गुरुवारी रात्री वैद्यकीय तपासणीनंतर अटकेची प्रक्रिया पूर्ण करण्यात आली. शुक्रवारी न्यायालयात हजर केले असता त्याला १० ऑगस्टपर्यंत पोलिस कोठडी ठोठावण्यात आली आहे.
भाजपच्या माजी खासदार डॉ. हिना गावित यांच्याबाबत कथित आक्षेपार्ह व जातीवाचक स्वरूपाचे संभाषण केल्याचा आरोप करत त्यांचे चुलत भाऊ रोहन शरद गावित यांनी नंदुरबार शहर (उपनगर) पोलिस ठाण्यात अनुसूचित जाती-जमाती अत्याचार प्रतिबंधक कायद्यासह विविध कलमान्वये फिर्याद दिली होती. त्यानंतर सामाजिक कार्यकर्त्या मालती वळवी यांनीही स्वतंत्र तक्रार दाखल केली. या गुन्ह्यांनंतर चौधरी काही दिवसांपासून फरार होता. सध्या डॉ. हिना गावित, रक्षा खडसे, मालती वळवी आणि आमदार आमश्या पाडवी यांच्याशी संबंधित कथित ध्वनीफीत प्रकरणांतील गुन्ह्यांच्या अनुषंगाने ही अटक करण्यात आली असून, पुढील तपासात आणखी कोणते धागेदोरे समोर येतात याकडे राजकीय वर्तुळाचे लक्ष लागले आहे.
रोज नव्या क्लिप्स
नंदुरबारमध्ये दररोज नव्या कथित ध्वनीफिती व्हायरल होत असून त्यातील संभाषणांमुळे अनेकांची बदनामी होत असल्याचा दावा केला जात आहे. या प्रकरणात चौधरीविरुद्ध आतापर्यंत सुमारे तीन गुन्हे दाखल झाले आहेत. कथित ध्वनीफितींमध्ये मंत्री गिरीश महाजन, मंत्री जयकुमार रावल, मंत्री रक्षा खडसे, आमदार आमश्या पाडवी, राजेश पाडवी व अमरीश पटेल तसेच इतर राजकीय नेत्यांशी संभाषण असल्याचा दावा आहे. मात्र, या सर्व ऑडिओ क्लिप्स कृत्रिम बुद्धिमत्ता तंत्रज्ञानाद्वारे छेडछाड करून तयार करण्यात आल्याचा दावा विजय चौधरी आणि संबंधित नेत्यांनी केला आहे.
.png "Videos"){kind=small}
