छत्रपती संभाजीनगर हादरले! गर्भवती राहिल्यानंतर प्रकार उघडकीस; मावस भावाकडूनच अल्पवयीन मुलीवर अत्याचार
छत्रपती संभाजीनगर : वाळूज एमआयडीसी परिसरातील जोगेश्वरी भागात अल्पवयीन मुलीवर तिच्याच २० वर्षीय मावस भावाने लैंगिक अत्याचार केल्याचा प्रकार समोर आला आहे. अत्याचाराच्या काळात मुलगी १७ वर्षे चार महिन्यांची होती. या घटनेनंतर ती गर्भवती राहिल्याचे वैद्यकीय तपासणीत स्पष्ट झाले. उपचारादरम्यान गर्भपात झाल्यानंतर हा प्रकार उघडकीस आला. पीडित मुलीने दिलेल्या तक्रारीवरून वाळूज एमआयडीसी पोलिसांनी संशयिताविरुद्ध पोक्सोसह विविध कलमांनुसार गुन्हा दाखल केला आहे.
पोलिसांनी दिलेल्या माहितीनुसार, २२ फेब्रुवारीपासून १ मार्चपर्यंत पीडित मुलीवर लैंगिक अत्याचार झाल्याचा आरोप आहे. या कालावधीत तिच्या २० वर्षीय मावस भावाने तिच्यावर वारंवार अत्याचार केल्याचे तक्रारीत नमूद करण्यात आले आहे. घटना घडली तेव्हा मुलगी अल्पवयीन होती. त्यामुळे या प्रकरणात पोलिसांनी पोक्सो कायद्यांतर्गत गुन्हा दाखल केला आहे.
या घटनेनंतर पीडित मुलगी मुंबईला गेली असता तिची प्रकृती खालावली. प्रकृती बिघडल्याने तिला वैद्यकीय उपचारासाठी दाखल करण्यात आले. डॉक्टरांनी केलेल्या विविध वैद्यकीय तपासण्यांदरम्यान ती गर्भवती असल्याचे समोर आले. गर्भधारणा स्पष्ट झाल्यानंतर तिला मुंबईतील एका खासगी रुग्णालयात पुढील उपचारासाठी दाखल करण्यात आले. मात्र, उपचार सुरू असतानाच तिचा गर्भपात झाला.
गर्भधारणा आणि त्यानंतर झालेल्या उपचारांच्या पार्श्वभूमीवर पीडित मुलीने तिच्यावर झालेल्या लैंगिक अत्याचाराची माहिती दिली. अत्याचाराचा प्रकार जोगेश्वरी परिसरात घडल्याने तिने वाळूज एमआयडीसी पोलिस ठाण्यात तक्रार दाखल केली. तक्रारीची दखल घेत पोलिसांनी संशयित मावस भावाविरुद्ध पोक्सोसह विविध कलमांनुसार गुन्हा नोंदवला आहे. या प्रकरणाची माहिती मिळाल्यानंतर पोलिसांनी तक्रारीतील घटनाक्रमाच्या आधारे तपास सुरू केला आहे. अत्याचाराच्या कालावधीतील परिस्थिती, पीडितेची वैद्यकीय तपासणी आणि तक्रारीतील आरोप याबाबत पोलिसांकडून पुढील तपास करण्यात येत आहे. या प्रकरणाचा पुढील तपास वाळूज एमआयडीसी पोलिस करीत आहेत.
.png "Videos"){kind=small}
