( फोटो सौजन्य- सोशल मीडिया)
Amruta Khanvilkar: अभिनय क्षेत्रात आपल्या दमदार कामगिरीने प्रेक्षकांची मनं जिंकणारी अभिनेत्री अमृता खानविलकर आता उद्योजिका म्हणूनही आपली वेगळी ओळख निर्माण करत आहे. अमृताने सुरू केलेल्या ‘अमूल्य’ या साडी ब्रँडची सध्या चांगलीच चर्चा आहे. विशेष म्हणजे, ब्रँड सुरू केल्यानंतर अवघ्या पाच महिन्यांत अमृताने ६१ लाइफस्टाइल ब्रँड्सना एकत्र आणत ‘अमूल्यवैभव’ हे खास प्रदर्शन भरवलं आहे.
ठाणे क्लब येथे आयोजित करण्यात आलेल्या या प्रदर्शनात अमृताच्या ‘अमूल्य’ ब्रँडसोबत तब्बल ६१ लाइफस्टाइल ब्रँड्सचे स्टॉल्स पाहायला मिळत आहेत. सणासुदीच्या काळात खरेदी करणाऱ्या ग्राहकांसाठी हे प्रदर्शन एकाच छताखाली विविध वस्तू उपलब्ध करून देणारं वन स्टॉप डेस्टिनेशन ठरत आहे.
अवघ्या पाच महिन्यांत इतक्या ब्रँड्सना एकत्र आणून प्रदर्शन आयोजित केल्यामुळे अमृताच्या उद्योजकीय प्रवासाचं कौतुक होत आहे.
या प्रदर्शनाला महाराष्ट्राचे उपमुख्यमंत्री एकनाथ शिंदे यांनी सदिच्छा भेट दिली. त्यांनी अमृता खानविलकरच्या ‘अमूल्य’ स्टॉललाही भेट देत तिच्या नव्या व्यवसायासाठी शुभेच्छा दिल्या.
एकनाथ शिंदे यांनी सोशल मीडियावर पोस्ट शेअर करत नव्या उद्योजिकांना प्रोत्साहन देण्याचा संदेशही दिला. अमृताच्या या उपक्रमाचं त्यांनी कौतुक केलं.
अमृता खानविलकरने अभिनयासोबतच निर्मिती क्षेत्रातही पाऊल ठेवलं आहे. आता उद्योजिका म्हणूनही ती नवी ओळख निर्माण करत आहे. तिचा हा बहुआयामी प्रवास अनेक महिलांसाठी प्रेरणादायी ठरत आहे.
‘अमूल्य’ या ब्रँडच्या माध्यमातून पारंपरिकतेसोबत आधुनिकतेचा मेळ साधण्याचा प्रयत्न अमृता करत आहे. त्यातच ६१ ब्रँड्सना एका व्यासपीठावर आणत तिने ‘अमूल्यवैभव’ प्रदर्शनाच्या माध्यमातून आपल्या व्यावसायिक दृष्टिकोनाची झलक दाखवली आहे.
दरम्यान, अमृता खानविलकर लवकरच ‘रक्तफळ’ या चित्रपटातून प्रेक्षकांच्या भेटीला येणार आहे. अभिनय आणि उद्योजकता अशा दोन्ही क्षेत्रांत सक्रिय असलेली अमृता आगामी काळात आणखी काही बहुआयामी भूमिका साकारताना दिसणार आहे.
.png "Videos"){kind=small}
