( फोटो सौजन्य- सोशल मिडिया)
Apurva Nemlekar: श्रावण महिना सुरू झाला की नवविवाहित महिलांमध्ये मंगळागौरीच्या सणाची विशेष उत्सुकता पाहायला मिळते. श्रावणातील प्रत्येक मंगळवारी मंगळागौरीचे व्रत करण्याची परंपरा आहे. या निमित्ताने महिला एकत्र येत पारंपरिक खेळ खेळतात. झिम्मा, फुगडी आणि जुन्या मराठमोळ्या गाण्यांमुळे मंगळागौरीच्या उत्सवाला खास रंग चढतो. टाळ्यांच्या तालावर गाणी म्हणत गोलाकार फिरत खेळला जाणारा झिम्मा आणि फुगडी हा या उत्सवाचा अविभाज्य भाग मानला जातो. त्यामुळे मंगळागौरीच्या माध्यमातून धार्मिक परंपरेसोबतच महाराष्ट्राची समृद्ध लोकसंस्कृतीही जपली जाते.
याच परंपरेचा अनुभव अभिनेत्री अपूर्वा नेमळेकर हिनेही घेतला आहे. लग्नानंतरची तिची पहिली मंगळागौर तिने थेट अमेरिकेतील कॅलिफोर्नियामध्ये साजरी केली. परदेशात असूनही अपूर्वाने मराठमोळ्या परंपरा आणि संस्कृतीची नाळ जपली. या खास सोहळ्याचे काही फोटो आणि व्हिडीओ तिने सोशल मीडियावर शेअर केले आहेत.
अपूर्वाने शेअर केलेल्या फोटोंमध्ये तिचा पारंपरिक मराठमोळा अंदाज पाहायला मिळत आहे. तिने लाल रंगाची नऊवारी साडी नेसली असून, त्यावर पिवळा शेला घेतला आहे. पारंपरिक दागिने, नाकातील नथ, कपाळावरील चंद्रकोर आणि हातातील हिरव्या बांगड्यांचा चुडा यामुळे तिचा लूक अधिकच खुलून दिसत आहे.
परदेशातील मंगळागौरीच्या या सोहळ्यात अपूर्वाने पारंपरिक खेळांचाही आनंद घेतला. तिच्या या खास अंदाजातील फोटो आणि व्हिडीओ सोशल मीडियावर चर्चेत आले आहेत.
अपूर्वाने आपल्या पहिल्या मंगळागौरीचा अनुभवही सोशल मीडियावर चाहत्यांसोबत शेअर केला. तिने लिहिलं, “माझी पहिली मंगळागौर आणि ती सुद्धा अमेरिकेतील कॅलिफोर्नियामध्ये झाली. आपल्या सुंदर मराठी परंपरा परदेशातही इतक्या प्रेमाने आणि उत्साहाने जपल्या जात असल्याचं पाहून खूप आनंद झाला. महाराष्ट्रापासून हजारो मैल दूर असूनही यानिमित्ताने घराच्या अगदी जवळ असल्यासारखं वाटलं. हा माझ्यासाठी खरोखरच खूप स्पेशल आणि अविस्मरणीय अनुभव होता.”
ती पुढे म्हणाली, “सर्वांमध्ये एक जबरदस्त उत्साह होता. त्यामुळे हा दिवस माझ्यासाठी कायम लक्षात राहणारा ठरला. सर्वांना एकत्र आणल्याबद्दल आणि सातासमुद्रापार आपली संस्कृती व परंपरा जिवंत ठेवल्याबद्दल ‘मराठी आई इनिशिएटिव्ह’ (MAI) आणि डॉ. सायली नातू यांचे मनापासून आभार. परदेशातही आपली संस्कृती आणि ही सुंदर नाळ जपली जातेय, हे पाहून मन भरून आलं.”
अपूर्वाने शेअर केलेल्या या खास पोस्टवर चाहत्यांनी कौतुकाचा वर्षाव केला आहे. तिचा पारंपरिक मराठमोळा लूक आणि अमेरिकेतही जपलेली महाराष्ट्राची संस्कृती चाहत्यांना विशेष भावली आहे. अनेकांनी कमेंट्स करत अपूर्वाच्या या खास लूकचे आणि मंगळागौरीच्या सेलिब्रेशनचे कौतुक केले.
राम-लक्ष्मणाच्या अतूट बंधाची आठवण करून देणारा ‘बंधू’; उपेंद्र लिमये आणि जितेंद्र जोशी प्रथमच एकत्र
दरम्यान, अपूर्वाच्या वैयक्तिक आयुष्याबद्दल सांगायचं झालं तर, तिने १४ फेब्रुवारी २०२६ रोजी तनुज गोवळकरसोबत लग्नगाठ बांधली. लग्नानंतरची ही तिची पहिलीच मंगळागौर होती. विशेष म्हणजे, अपूर्वाच्या या खास सोहळ्यात तिचा पती तनुज गोवळकरही सहभागी झाला होता. कॅलिफोर्नियामध्ये झालेल्या या मंगळागौरीच्या कार्यक्रमात त्याचीही उपस्थिती पाहायला मिळाली.
अशाप्रकारे महाराष्ट्रापासून हजारो मैल दूर अमेरिकेत अपूर्वाने आपली पहिली मंगळागौर साजरी करत मराठमोळ्या संस्कृतीची सुंदर झलक दाखवली.
.png "Videos"){kind=small}
