गुरुवार, 29 ऑक्टोबर 2026
(फोटो सौजन्य- सोशल मीडिया)
Bollywood Actor : बॉलिवूडमधील लोकप्रिय अभिनेत्यांपैकी एक असलेले संजय मिश्रा त्यांच्या अभिनयकौशल्यासोबतच साध्या स्वभावासाठीही ओळखले जातात. आपल्या दमदार अभिनयाने प्रेक्षकांची मनं जिंकणारे संजय मिश्रा आता पुन्हा एकदा त्यांच्या साधेपणामुळे चर्चेत आले आहेत. नुकतीच त्यांनी आपल्या मूळ गावी भेट दिली. यावेळी कोणताही थाटमाट न करता साधी लुंगी आणि टी-शर्ट परिधान करून ते गावात वावरताना दिसले. त्यांचा हा देसी अंदाज सोशल मीडियावर चर्चेचा विषय ठरला आहे.
संजय मिश्रा बिहारमधील दरभंगा येथील त्यांच्या वडिलोपार्जित नारायणपूर गावात पोहोचले होते. गावात पोहोचताच त्यांना पाहण्यासाठी आणि भेटण्यासाठी गावकऱ्यांनी गर्दी केली. यावेळी त्यांनी नातेवाईक आणि गावकऱ्यांची भेट घेतली. विशेष म्हणजे, बॉलिवूडमध्ये लोकप्रिय असलेले संजय मिश्रा गावात मात्र अगदी साध्या पेहरावात दिसले.
लुंगी आणि टी-शर्ट घालून गावात फिरणाऱ्या संजय मिश्रा यांचा हा साधेपणा चाहत्यांचे लक्ष वेधून घेत आहे. एका घराच्या व्हरांड्यात निवांत बसलेले असतानाचा त्यांचा व्हिडिओही सोशल मीडियावर व्हायरल होत आहे.
कुलदेवीचं दर्शन घेऊन घेतले आशीर्वाद
मूळ गावी पोहोचल्यानंतर संजय मिश्रा यांनी आपल्या कुटुंबाच्या कुलदेवीच्या मंदिराला भेट दिली आणि आशीर्वाद घेतले. यावेळी त्यांनी गावकऱ्यांसोबत संवाद साधला आणि त्यांच्यासोबत फोटोही काढले. आपल्या मुळांशी जोडलेलं नातं जपणाऱ्या संजय मिश्रा यांचा हा अंदाज चाहत्यांना भावत आहे.
राष्ट्रीय पुरस्कारानेही झाले सन्मानित
संजय मिश्रा यांच्या अभिनयाची अलीकडेच राष्ट्रीय स्तरावरही दखल घेण्यात आली. ७२ व्या राष्ट्रीय चित्रपट पुरस्कार सोहळ्यात भक्षक चित्रपटासाठी त्यांना सर्वोत्कृष्ट सहाय्यक अभिनेत्याचा पुरस्कार प्रदान करण्यात आला. पुरस्कार स्वीकारण्यासाठी त्यांनी स्वतःचे कपडे इस्त्री केल्याची बाबही चर्चेत आली होती. या प्रसंगातून त्यांच्या साधेपणाची झलक पाहायला मिळाली.
संजय मिश्रा यांचा गावातील हा व्हिडिओ सध्या सोशल मीडियावर चर्चेत आहे. प्रसिद्धी आणि लोकप्रियता मिळाल्यानंतरही साधेपणा जपणाऱ्या अभिनेत्याचं चाहते कौतुक करत आहेत. बॉलिवूडच्या झगमगाटापासून दूर आपल्या माणसांमध्ये रमलेले संजय मिश्रा त्यांच्या चाहत्यांना पुन्हा एकदा भावले आहेत.
